“Рома”даги жамоадошларим мен билан ҳатто сўрашмай қўйди!

“Рома”нинг энг иқтидорли футболчиларидан бири ҳисобланган Николо Дзаньоло январда Элдор Шомуродов каби Римни тарк этишга мажбур бўлди. Легионеримиз Италияда қолган бўлса, Дзаньоло Туркияга йўл олди.

Рим ҳужумчиларининг ўртасидаги яна бир фарқ шундан иборатки, “Рома” мутасаддилари Элдор Шомуродов “Специя”га вақтинчалик жўнатди ва мавсум якунланганидан кейин ўзбек ҳужумчиси яна пойтахтга қайтади.

Николо Дзаньоло эса, турли келишмовчиликлар ортидан арзон баҳога тўлиқ сотиб юборилди. Турклар ўз вақтида 55 миллион еврога баҳоланган ҳужукор футболчини атиги 15 миллион еврога қўлга киритиб, 2027 йилнинг ярмигача шартнома имзолади.

Вазиятнинг ўзгариб кетишига кўп жиҳатдан 23 ёшли футболчининг клубдан кетиш илинжида жамоа учун ўйнашдан бош тортгани, кейинчалик эса, клуб келишиб қўйган паллада Англия чемпионатига йўл олишни рад этгани сабаб бўлди.

Футболчи фаолиятидаги кутилмаган бурилишлар унинг Италия терма жамоасидаги мавқеига ҳам таъсир қилди.

“Галатасарой” вакили сифатида  Николо Дзаньоло “Рома”даги фаолиятини эсга олиб, журналистларга ўз фикрларини билдирди.

Терма жамоа ҳақида

Фаолиятимни уч ойга тўхтатиб қўйишди ва терма жамоага кириш учун энди кўпроқ ишлашим керак. Мен терма жамоадаги ёрдамчи мураббий Сальсано билан гаплашдим. У менга хотиржам бўлишимни ва мени кузатиб боришаётганини, қачонки аввалги формамни тикласам, чақирув автоматик тарзда келишини айтди.

Мен Миллатлар лигаси финалида ўйнашни истайман. Терма жамоам ҳақида кўп қайғураман, Италия шарафини ҳимоя қилишдан устун нарсанинг ўзи йўқ.

“Рома” ҳақида

Мен клуб томонидан бажарилмаган ваъдалар ҳақида соатлаб гапиришим мумкин. Фанатлари мени хоинга чиқаришди. Аслида менда “Борнмут” ва “Галатасарой”дан бошқа таклифлар ҳам бор эди. Англияни танламаганим учун мени ҳайдашди, мухлислар эса бор айбни менга тўнкади. Айнан мана шу нарсадан энг кўп афсусланаман. Чунки “Рома”да ғолиб бўлдим, терма жамоага таклиф олиб, дебютимни нишонладим, пойтахтда ўғлим туғилди.

Ўша вазиятга тушиш мен учун катта зарба бўлди. Собиқ жамоадошларимнинг деярли барчасидан ҳафсалам пир бўлди. Исмларни айтмайман, лекин аввал улар биз ака-укамиз, деб туриб, кейинчалик сўрашишга ҳам ярамади.

Моуриньо ҳақида

Жозе Моуриньо ажойиб инсон ва зўр мураббий. Ҳар доим мени ўйнашга мажбурларди. У юлдуз футболчиларни бошқаришга ўрганиб қолган, мен эса бунга кўникмаганман. Тўрт-беш йилдан кейин бирга ишласак яхши бўларди. Шунга қарамай, у менга жуда кўп нарса берди.

А Серияга қайтиш ҳақида

Ҳеч ким олдинда ўзини нималар кутаётганини билмайди. Мен кейинги беш йилни Туркияда ўтказаман, деб кафолат беролмайман. Ҳозирча шу ерда эканман имкониятларимни максимал даражада кўрсатишга ҳаракат қиламан.

“Специя”: Бу ишни фақат Шомуродов уддалади!

Шомуродов ва Лукаку тандемини кўрамизми?