Роналду жаҳон чемпионатидан чиқиб кетгач, бир оғиз сўз айтди

Португалия терма жамоаси Жаҳон чемпионатидаги иштирокини 1/8 финал босқичида якунлади. Жамоа кескин курашда Испания миллий термасига минимал ҳисобда мағлуб бўлди. 

«Қизил фурия» ягона гол эвазига 1:0 ҳисобида ғалаба қозонди. Учрашув тақдирини ярим ҳимоячи Микель Меринонинг охирги дақиқаларда урган голи ҳал қилди.

Португалия терма жамоасининг юлдуз ҳужумчиси Криштиану Роналду мусобақадан чиқиб кетганидан сўнг ижтимоий тармоқларда қисқа, аммо ҳис-туйғуга бой хабар қолдирди.

- Португалия абадий, – деб ёзди 41 ёшли тўпурар ўз саҳифасида.

Шимолий Америкада ўтаётган жаҳон чемпионатида Криштиану Роналду бешта ўйинда майдонга тушди. Мазкур беллашувлар давомида у рақиб дарвозасини уч марта ишғол этишга муваффақ бўлди.