Россия клуби ўзбек футболчиси кетганини расман эълон қилди. Яна бир легионеримиз жамоа қидиради!
Россия миллий футбол лигасидаги легионерларимиз биттага камайди. Маълумки, ушбу лигада Вагиз Галиулин ва Бобур Давлатов “Нефтехимик”, Виталий Денисов “Томь” шарафини ҳимоя қилаётган эди.
“Нефтехимик” клуби матбуот хизмати 25 ёшли ярим ҳимоячи Бобур Давлатов клубни тарк этганини расман маълум қилди.
- Бобурни жамоамизга бағишлаган вақти учун миннатдорлик билдирамиз ва келгуси фаолиятида омад тилаймиз, - дейилади “Нефтехимик” баёнотида.
Бобур Давлатов бу жамоа таркибида икки марта тўп тепган. 2016-2017 ва 2020-2021 йилги мавсумларда нижнекамскликлар жамоасида жами 20 та ўйин ўтказиб, битта голли пас оширди. Истеъдодли футболчимиз кейинги пайтда асосий таркибга киришга қийналаётган эди.
“Нефтехимик” сардори ва етакчиси Вагиз Галиулин эса мавсумда анча фаол ўйнади. У чемпионатда жами 31 та учрашувда майдонга тушиб, тўртта гол уришга эришди.
Тажрибали ҳимоячи Виталий Денисов ҳам “Томь”ни тарк этиши кутилмоқда. Ҳамюртимиз томскликлар билан мавсум охирига қадар шартнома имзолаган эди. “Томь” қуйи лигага равона бўлганин инобатга олсак, Виталий Денисов ёзда ўзига янги жамоа қидиради.
Денисов жорий мавсумда “Томь” таркибида 23 та учрашувда майдонга тушди ва жамоа етакчи футболчиси сифатида эътибор қозонди.
Фикрлар