Рўзиқул Бердиев: Чемпиондан яхши ўйнаб, мағлубиятга учрадик
Ўзбекистон Суперлигаси 14-туридан ўрин олган "Пахтакор" - "Насаф" учрашувида пойтахтликлар 1:0 ҳисобида ғалаба қозонди. Ўйиндан кейин ташкил этилган матбуот анжуманида "аждарлар" устози Рўзиқул Бердиев иштирок этди ва қуйидаги фикрларни билдириб ўтди:
"Ўзингиз гувоҳи бўлганингиздек, курашлар ва ҳиссиётларга бой беллашув бўлди. Биз рақибга ўз ўйинини кўрсатишга имкон бермадик. Менимча, "Пахтакор" бугун энг ёмон ўйинларидан бирини ўтказди ва якунда ғалаба қозонди. Рақибга ўйин бермаслик учун кўпроқ босим уюштиришимиз талаб этиларди ва ўйлайманки, баҳс учун танлаган тактикамиз бизга қўл келди.
Менимча, бугун "Пахтакор"га қараганда кўпроқ вазият яратдик, лекин улардан фойдалана олмадик. Чемпиондан яхши ўйнадик, бироқ мағлубиятга учрадик. Ҳимоячи ва дарвозабонимиз йўл қўйган хато туфайли имкониятни бой бердик.
Суперлигамизда бизнинг футболчилардан кўпроқ югурадиган бирорта жамоани билмайман. Шунинг учун, биз прессингда ҳаракат қиламиз. Мағлубиятларимизга сабаб қилиб етакчи футболчиларимизнинг йўқлигини кўрсатган бўлардим. Менимча, улар қайтса, сиз кутган футболни намойиш эта оламиз.
Билсангиз, "Пахтакор" ҳужумлари асосан, Одил Ҳамробеков орқали бошланади. Ойбек Бозоровнинг бугунги ўйин учун вазифаси уни зарарсизлантириш эди. Балки Ойбек ҳужум бобида ўзини кўрсата олмагандир, лекин мен юклаган вазифани уддалади.
Ўйин вақтида ҳиссиёт билан ҳакамнинг қарорларига эътироз билдиришимнинг нимаси ёмонлигини тушунмайман. Уларни ҳақорат қилмаяпман. Мен мураббийман. Табиийки, айрим вазиятларда жаҳлим чиқади. Футболимиз шу билан қизиқ-ку, ахир.
Фикрлар