Шахмат фестивали республика босқичи бўлиб ўтди

Жорий йилнинг 27 март куни Халқаро шахмат академиясида мактабгача таълим ташкилотлари тарбияланувчилари ўртасида “Шахмат фестивали” мусобақасининг республика босқичи бўлиб ўтди.

Мазкур мусобақа Мактабгача ва мактаб таълими вазирлиги, Ўзбекистон шахмат федерацияси ҳамда Халқаро шахмат академияси ҳамкорлигида ташкил этилди.

Унда вилоятлар, Тошкент шаҳри ҳамда Қорақалпоғистон Республикасидан сараланган 28 нафар ёш шахматчи иштирок этди. Беллашувлар қизлар ва ўғил болалар ўртасида алоҳида гуруҳларда ташкил этилди.

Якуний натижаларга кўра, қизлар ўртасида Саидбахромова Шукрона ғолибликни қўлга киритган бўлса, ўғил болалар ўртасида Халилов Саид биринчи ўринни эгаллади.

Мусобақа якунида ғолиб ва совриндорлар қимматбаҳо эсдалик совғалари, диплом ҳамда медаллар билан тақдирланди.