Шомуродов 2025 йилнинг сўнгги ўйинини ҳам “ёндирди”!
Ўзбекистон миллий терма жамоаси етакчилари Элдор Шомуродов ва Аббосбек Файзуллаев “Истанбул Башакшеҳир” сафида 2025 йилнинг сўнгги ўйинини ҳам юқори даражада ўтказди.
Суперлиганинг 17-турига тўғри келган бу учрашувда истанбулликлар ўз майдонида мусобақа жадвалида еттинчи поғонада бораётган “Газиантеп” жамоасини қабул қилиб, йирик ҳисобда зафар қучди.
Учрашувнинг 21-дақиқасида Элдор Шомуродов бир неча ҳимоячининг орасида турганига қарамай, аниқ зарба билан ҳисобни очди.
Орадан беш дақиқа ўтиб, рақиб футболчиси Дрисса Камара ҳисобни танглаштиришга муваффақ бўлди. Бироқ меҳмонларнинг хурсандчилиги узоққа чўзилмади.
29-дақиқада Аббосбек Файзуллаевни ўзини кўрсатди. Ҳимоячилардан чаққон ҳаракат қилиб, тўпга биринчи етиб келган 22 ёшли ҳужумкор футболчи мураккаб зарба билан гол уриб, ҳисобдаги фарқни яна оширди.
Ўйиннинг иккинчи ярмида “Газиантеп” вакили Арда Кизилдағ “Истанбул Башакшеҳир” ҳужумини қайтаришда тўпни ўз дарвозасига киритиб қўйди. Орадан ўн беш дақиқа ўтиб, Элдор Шомуродов аниқ пас билан Умут Гюнешни голли позицияга чиқарди ва турк футболчиси зарба беришда адашмади.
Истанбулликларнинг бешинчи голи Иван Брнич ҳисобига ёзилди – 5:1.
Учрашувнинг қолган қисми мезбонлар устунлигида ўтди. Бу ғалабадан кейин Нури Шахин шогирдлари очколари сонини 23 тага етказиб олди ва очколар ҳисобида ўзидан юқорида турган “Газиантеп” ҳамда “Кожаэлиспор” билан тенглашди. "Башакшеҳир" тўплар нисбатига кўра, еттинчи ўринга кўтарилди. Энди Нури Шахин шогирдлари мавсумнинг иккинчи ярмида Еврокубоклар йўлланмасини қўлга киритиш учун курашади.
Қувонарлиси эса, Элдор Шомуродов тўпурарлар пойгасида 12 та гол билан етакчилик мавқеини сақлаб қолди. Бундан ташқари, учта ассистни қўшиб ҳисоблаганда, 30 ёшли ҳужумчимиз Суперлиганинг энг самарадор ўйинчилари рейтингида биринчи ўринда бормоқда.
Тўпурарлар баҳсида Элдор Шомуродовн билан тенгма-тенг кураш олиб бораётган Пол Онуачу ҳисобида 11 та гол бор. “Трабзонспор” ҳужумчиси Нигерия терма жамоасига чорлов олгани учун Туркия чемпионатининг охирги ўйинларини ўтказиб юбормоқда. Шу боис, Элдор Шомуродов чемпионатнинг биринчи қисмини энг яхши тўпурар ва энг самарали футболчи мақомида якунлаши аниқ.
“Олтин бутса” совринига даъвогар қолган тўпурарлар ҳам анча жонланиб қолди. “Галатасарой” юлдузи Мауро Икарди ва “Фенербаҳче”нинг бразилиялик легионери Талиска чемпионатдаги голлари сонини 9 тага етказиб олди.
“Коньяспор”дан Умут Найир ва “Фенербаҳче”да ўйнаётган “Реал”нинг собиқ юлдузи Марко Асенсио эса ҳозиргача саккиз мартадан тўп киритган. Европа футболида ном қозонган Тэмми Абрахам (“Бешиктош”) ва Юссуф Эн-Несири (“Фенербаҳче”) ҳисобида эса еттитадан гол бор.
Элдор Шомуродов Истанбул клубига кўчиб ўтганидан бери 17 та учрашувдан 11 тасида рақиблар дарвозасини ишғол қилишни уддалаб келмоқда. Суперлига кашфиётига айланган Элдор Шомуродов бугунга қадар “Бешиктош”, “Аланьяспор”, “Коньяспор”, “Галатасарой”, “Кожаэлиспор”, “Генчлербирлиги”. “Трабзонспор”, “Касимпаша”, “Газиантеп” дарвозаларига биттадан тўп киритган бўлса, “Антальяспор” жамоаси дарвозасини икки бор ишғол қилган.
Аббосбек Файзуллаев ҳам муҳим паллада жамоанинг асосий ўйинчилари қаторига қўшилди. 22 ёшли ҳужумкор футболчимиз Суперлигада тўққизта учрашувда “Касимпаша” ва “Газиантеп” дарвозабонларини ожиз қолдирди.
“Башакшеҳир” Туркия чемпионатидаги навбатдаги учрашувини 2026 йилнинг 18 январь куни ўз майдонида “Фотиҳ Карагюмрюк” жамоасига қарши ўтказади.
Ҳусанов, семириб кетма!
Фабио Каннаваро “ЖЧ-2026” олдидан барча муаммоларни очиб берди
Жойини Нуньешдан қайтиб олган Ҳусановнинг ўйини қандай баҳоланди?
Гвардиола Ҳусановни танқид қилган мураббийни “разбор”га чақирди
Фикрлар