Шомуродов Европа лигасида ўйнамагани сабаби маълум бўлди!
“Рома” жорий мавсумда икки фронтда кураш олиб боришига тўғри келмоқда. Клаудио Раньери жамоани А Серияда тўққизинчи ўринга кўтаришга муваффақ бўлди. “Бўрилар” янада юқори позициялар учун ҳаракат қилмоқда.
Рим клуби мавсумни муваффақиятли якунлаши учун Европа лигасида ғолиб чиқиши кифоя. Ҳозирча бунга имкон бор. “Рома” нуфузли халқаро мусобақанинг плей-офф босқичи ўтиш ўйинида “Порту” билан рақобатлашмоқда.
Португалияда бўлган биринчи учрашувда кучлар тенг келди – 1:1. Биз учун эътиборли жиҳати бунгача А Серия ва Италия кубоги доирасидаги учта баҳсдан иккитасида бошланғич таркибда ўйнаган Элдор Шомуродов “Португа” билан бўлга беллашувдан умуман кўринмади.
“Рома” бу баҳсда жуда қийналди. Жамоа етакчиси Пауло Дибала биринчи бўлимнинг ўзида жароҳат туфайли ўйиндан чиқди. Бош ҳакам Тобиас Штилер римликларга саккиз маротаба огоҳлартириш берди. Брайан Кристанте саккиз дақиқа ичида икки марта сариқ карточка олди ва майдонни тарк этишига тўғри келди.
Клаудио Раньери “Порту”га қарши беллашувда Элдор Шомуродовнинг хизматидан фойдаланмагани сабаби энди маълум бўлди. “Рома”да марказий ҳужумчилар етишмовчилиги бор. Тақвим тиғизлиги туфайли мураббийлар штаби кутилмаган қарорлар чиқаришига тўғри келмоқда.
Италия матбуотининг ёзишича, Клаудио Раньери Элдор Шомуродовни 16 февраль куни А Сериянинг 25-тури доирасида сафарда “Парма”га қарши бўладиган учрашувда илк дақиқалардан ўйнатишни режалаштиргани боис, Португалиядаги баҳсда легионеримизга дам берган.
- Таркибдан жой олган бир ўйинчи 72 соат фарқи билан юқори савияда ўйин намойиш қила олмайди, - деди Клаудио Раньери.
Бу масалага нуфузли манбалардан бири – siamolaroma.it сайти қуйидагича изоҳ берди.
- Томмазо Бальданци ва Элдор Шомуродов “Парма”га қарши ўйинда бошланғич таркибдан жой олиши кутилмоқда. Чунки “Рома” олдида Европа лигасининг жавоб учрашувида “Порту” масаласини ҳал қилишдек жиддий вазифа турибди.
Шу боис, “Парма” билан бўладиган баҳсда таркиб ротация қилинади. Матс Ҳуммельс ва Лоренцо Пеллегрини бошланғич таркибга қайтади. Шунингдек, Европа лигаси қайдномасидан четда қолган янги футболчилар – Лукас Гурна-Дуат ҳамда Анасс Салоҳиддинга имконият берилади.
“Порту”га қарши баҳсда жароҳат олган Пауло Дибаланинг йўқлигини билдирмаган Бальданци бу гал ҳам жамоага ёрдам бериши керак. Ниҳоят, Элдор Шомуродов тиззасидаги жароҳат безовта қилаётган ва ҳордиқ чиқаришга эҳтиёж сезаётган Артём Довбик ўрнига ҳужум марказидан ўрин олади, - деб ёзди siamolaroma.it сайти эксперти Федерико Тонини.
Таъкидлаш жоизки, гарчи 29 ёшли легионеримиз мавсумни “Рома”да якунланиши эҳтимоли жуда катта бўлса-да, келажакда бошқа жамоага ўтиши мумкин. Аслида ҳозирнинг ўзида ҳамюртимизга “Торонто” қизиқиш билдирмоқда. МЛС чемпионати иштирокчилари учун трансфер бозори апрелнинг охирги ҳафтасигача очиқ бўлади.
Бундан ташқари, А Сериянинг ўзидан “Торино” ўзбек футболчисини ёзда ўз сафига қўшиб олишни режалаштираётганини маълум қилди.
Элдор Шомуродов бу мавсум барча турнирларда 20 та учрашувда иштирок этиб, учта гол ва битта ассист муаллифи бўлди.
Фикрлар