Шомуродов ҳам еврода миллионер экан! “Кальяри” футболчилари маоши эълон қилинди
Италия А Серияси клублари маош бериш борасида Англия, Испания, Франция грандлари билан рақобатлашиши қийин. Бироқ бу лигада ҳам яхши ўйинчиларни маош масаласида хафа қилишмайди.
Кўпчилик футбол ишқибозларини футболчиларнинг топиш-тутиши қизиқтириши табиий. Айниқса, кучли бешлик лигаларида тўп тепаётган ўйинчиларнинг моддий аҳволини билишни истайдиганлар кўп.
Хўш, А Серия дебютанти “Кальяри” таркибидаги ижрочиларга қанчадан тўлаяпти? Гол ура олмаётган Элдор Шомуродовнинг маоши қанча?
Бу саволларга Италия футболини ёритиб келаётган https://www.tuttomercatoweb.com сайти экспертлари аниқлик киритди.
“Кальяри” А Серияда 30 нафар футболчини рўйхатдан ўтказган. Улардан 14 нафари Сербия, Греция, Польша, Словакия, Бразилия, Гана, Конго, Уругвай, Хорватия, Чехия, Ўзбекистон, Ангола, Перу вакиллари ҳисобланади.
Сардиния клуби бир мавсум давомида футболчиларнинг маошларига 19,2 миллион евро харажат қилиши кўрсатилган.
Жамоада энг катта маош олаётган уч нафар футболчидан иккитаси ўтган ёзда трансфер қилинган ўйинчилардир. Сардиния клуби раҳбарияти Андреа Петаньяни кўндириш учун унга 1,8 миллион евро миқдорида йиллик маош таклиф қилган. Бироқ 28 ёшли футболчи ҳали маошига яраша самара кўрсатгани йўқ. Петанья А Серияда етти марта майдонга тушиб, битта ассист билан чекланди холос.
Кейинги ўринда 2019 йилдан бери сардинияликлар шарафини ҳимоя қилаётган Найтан Нандес қайд этилган. Уругвай терма жамоаси футболчиси ҳар мавсум 1,6 миллион евро миқдорида маош оляпти. У Италия чемпионатида ўнта ўйинда биттадан гол ва ассист муаллифи бўлди.
Манбага кўра, ёзда “Рома”дан ижарага олинган Элдор Шомуродовнинг йиллик маоши 1,5 миллион еврони ташкил қилаётган экан. Шомуродов ҳам спорт формасини тиклашга уўоқ вақт сарфлагани боис, чемпионатнинг бошида ўзини кўрсата олмади. Ўйини энди кучая бошлаган легионеримиз ўнта учрашувда битта ассист узатган.
Таъкидлаш лозимки, бу уч ўйинчи “Кальяри”нинг энг қимматбаҳо футболчилари ҳисобланади. Петаньянинг трансфер нархи 7,5 миллион еврони ташкил қилади. Шомуродов 6 миллион ва Нандес 5 миллион еврога баҳоланмоқда.
“Кальяри”нинг қуйидаги футболчилари бир мавсум учун бир миллион ва ундан кўп маош оляпти:
Петанья 1,8 миллион евро
Нандес 1,6 миллион евро
Шомуродов 1,5 миллион евро
Перейро 1,4 миллион евро
Лападула 1,1 миллион евро
Янкто 1 миллион евро
Олти нафар ўйиндан ташқари қолган футболчиларнинг йиллик моянаси бир миллион еврога етмайди. Манкосу, Виола, Хацидиакос, 800 минг, Макумбу, Рог, Паволетти 700 минг, Лувумбо, Голданига 600 минг, Ацци, Аужелло, Витеска, Радунович 500 минг, Оберт, Доссена, Дейола 400 минг, Капрадосси, Дзаппа, Скаффет, Сулемана 300 минг, Прати, Арести, Ористанио, Ди Пардо 200 минг, Десогус 100 минг евро миқдорида маош олади.
Фикрлар