Шомуродов трансфери: “Рома” якуний нарх белгилади, уч клуб қаттиқ курашмоқда!

2 январь куни Италияда қишки трансферлар ойнаси очилади. “Рома” жамоаси ҳам клуб хайрлашадиган ва олиб келадиган футболчилари рўйхатини шакллантириб бўлган. Тьягу Пинто барча трансферлар бўйича назоратни ўзида сақлаб турибди.

Италия матбуоти қишки трансферлар ойнасида Элдор Шомуродовнинг бозори қизғин кечиши кутилмоқда.

Аслида анчадан бери А Сериянинг бир неча клуби – “Монца”, “Специя”, “Кремонезе”, “Сассуоло”, “Фиорентина”, “Торино”, “Сампдория”, “Болонья”дан қизиқиш борлиши ҳақида маълумотлар тарқатилганди. Ҳатто бир неча клуб бўлажак трансфер бўйича “Рома”га мурожаат қилган, айримлари ҳамон келишишга уринишни давом эттиряпти.

“Рома” раҳбарияти ўзбекистонлик легионери билан тўлиқ хайрлашишга тайёрлиги бир неча манбаа орқали тасдиқланди.

Спортга ихтисослашган машҳур нашрларидан бири Corriere della Sera газетаси Рим клуби Элдор Шомуродов трансфери учун аввалдан талаб қилиб келган 12 миллион евро миқдоридаги суммани бироз пасайтирди.

Январда легионеримизни тўлиқ трансфер қилмоқчи бўлган клуб “Рома” ғазнасига 10 миллион евро ўтказиб беришига тўғри келади. Элдорни мавсум охиригача ижарада ўйнатмоқчи бўлган клублар футболчини ёзда белгиланган суммага харид қилиш мажбуриятини ўз зиммасига олишига тўғри келади.

Сўнгги маълумотларга қараганда, Элдор Шомуродов учун ҳозирнинг ўзида учта клуб даъвогар. Қишда ҳужум чизиғини кучайтиришга ҳаракат қилаётган “Торино”, “Фиорентина” ва “Сампдория” ўзбек ҳужумчисини ўз сафига қўшиб олишга ҳаракат қилмоқда, деб хабар тарқатди https://www.calciomercato.com сайти.

Даъвогар клублар орасида туринликлар ва флоренцияликлар анъанавий тарзда Еврокубокларга йўлланма берадиган ўринлар учун курашиб келади. “Сампдория” эса бу мавсумда А Сериядаги ўрнини сақлаб қолишга ҳаракат қиляпти.

Элдорнинг ўзи “Торино”га кўчиб ўтишни маъқул кўраётгани ҳақида бир неча манба хабар тарқатди. Бу трансфернинг амалга ошишига Рим клуби ижара вариантига кўнмай, талаб қилинаётган суммани бирданига тўлаш шарти тўсқинлик қилиб турибди.

Трансфер мутахассислар римликларнинг бу талабини 2021 йилнинг ёзида “Рома” Элдор Шомуродовни трансфер қилиш учун “Женоа”га анча катта сумма – 18 миллион евро тўлагани билан изоҳламоқда.  

Хулоса қилиб айтганда, Элдор Шомуродовнинг фаолиятида ўзгариш бўлишининг эҳтимоли катта. Чунки Ўзбекистон миллий терма жамоаси етакчиси ва сардорига мунтазам ўйин амалиёти керак. Жозе Моуриньон “Рома”нинг ўртоқлик учрашувларида ҳам Шомуродовга бошланғич таркибдан жой бераётгани йўқ, фақатгина бир неча дақиқа ўйнатмоқда.

Шундан келиб чиққан ҳолда, Элдор ҳам Рим клубидан кетиб, бошқа жамоада нималарга қодирлигини кўрсатиши кутилмоқда.

Шомуродов “махсус” терма жамоага тушди!

Тўпурар ҳужумчимиз маошни танласинми ёки Москва клубини?