Shomurodov uchun jiddiy imtihon!
A Seriyaning 31-turida Italiya futbolining eng qadimiy jamoalari “Milan” va “Jenoa” o‘zaro to‘qnash keladi.
Joriy mavsumda milanliklar uzoq muddatdan beri orzu bo‘lib qolayotgan chempionlik uchun kurashishi kutilgan edi. Jamoa etakchisi Zlatan Ibrohimovich “Milan”ga skudettoni taqdim qilishga va’da berandi. Avvaliga hammasi bu jamoa foydasiga hal bo‘ldi. Ketma-ket g‘alabalar evaziga Stefano Pioli shogirdlari ma’lum muddat musobaqa jadvalining eng yuqori qismida ham yurdi. Bunda to‘qqiz mavsumdan beri chempionlikni hech kimga bermay kelayotgan “Yuventus”ning bu yil barqarorlikni yo‘qotib qo‘ygani ham muhim ahamiyat kasb etdi.
Lekin keyinchalik “Milan” futbolchilari chempionlik yo‘lidagi asosiy raqobatchilari “Atalanta”, “Yuventus”, “Inter” va “Napoli”ga o‘z maydonida imkoniyatni boy bergani va mazkur uchrashuvlarda raqib darvozasiga bittadan ortiq gol ura olmagani bu jamoaning hali chempionlik uchun tayyor emasligini ko‘rsatib qo‘ydi.
Ayni paytda “Milan” 30 ta o‘yindan keyin 63 ochko bilan ikkinchi pog‘onada bormoqda, lekin bu jamoani ta’qib etib kelayotgan “Yuventus”, “Atalanta”, “Napoli” imkon bo‘lishi bilan beqaror o‘yin ko‘rsatayotgan Stefano Pioli shogirdlaridan o‘zib ketishi mumkin. Birinchi o‘rindagi “Inter” esa, mazkur raqobatchilaridan ancha ilgarilab ketgan va endi skudettoni qo‘ldan chiqarmasa kerak.
“Jenoa” mavsumda jamoa oldiga qo‘yilgan vazifani uddalab bo‘lgan. Davide Ballardini genuyaliklar futbolchilarni xavfli hududdan olib chiqib ketdi. Jamoaga quyi ligaga tushib ketish xavf solayotgani yo‘q. Lekin “Jenoa”ni Evrokuboklar zonasiga yaqinlashtirishning imkoni bo‘lmadi.
Eldor Shomurodov jamoasi keyingi paytda yoki durang o‘ynayapti, yo kichik hisobda yutqazib qo‘ymoqda. Jamoa anchadan beri 13-pog‘onadan siljigani yo‘q. Genuyalik futbolchilar ko‘rsatayotgan o‘yin jamoaning A Seriyada qolishiga loyiq.
“Jenoa” o‘tgan turda “Yuventus” mehmoni bo‘ldi va turinliklar 3:1 hisobida zafar quchdi. Tarkiblar qudratidagi farq o‘yinda yaqqol ko‘zga tashlandi.
Bugun bo‘ladigan o‘yinda ham “Milan” tarkib jihatidan genuyaliklardan ancha kuchli. O‘zaro bellashuvlar statistikasida ham ustunliklar mezbonlar tomonida. Qolaversa, uyda devorlar ham suyaydi.
“Milan” va “Jenoa” o‘rtasidagi 148 ta qarama-qarshilikda milanliklar 65 marta zafar quchgan bo‘lsa, “Jenoa” 37 ta bahsni o‘z foydasiga hal qilgan, 46 ta uchrashuvda kuchlar teng kelib, g‘olib aniqlanmagan. To‘plar nisbati ham milanliklar foydasiga – 227:168.
Genuyaliklar muxlislarga, Eldor Shomurodov orqasidan bu jamoaga ishqibozlik qilayotgan o‘zbekistonlik futbol ixlosmandlariga umid berayotgan jihati shuki, “Jenoa” oxirgi o‘zaro bahslarda ijobiy ko‘rsatkich qayd etmoqda. Xususan, o‘tgan chempionatda “Jenoa” safar uchrashuvidan 2:1 hisobidagi g‘alaba bilan qaytdi. Joriy chempionatning birinchi davrasida genuyaliklar o‘z maydonida 2:2 hisobida durang o‘ynadi. Mazkur uchrashuvning eng faol futbolchilaridan biri Eldor Shomurodov bo‘lgandi.
Legionerimiz bugungi o‘yin qaydnomasidan joy olgan. Biroq, bahsni qaysi pallasida maydonda bo‘lishi hozircha noma’lum. Lekin Eldorning tarafdorlari keyingi paytda gol ura olmayotgan hujumchidan bu gal ham o‘zini ko‘rsatishini kutmoqda. Sir emaski, Shomurodov kuchli jamoalarga qarshi o‘zgacha ishtiyoq bilan to‘p suradi. Shu ma’noda, bugun “Juzeppe Meatstsa” stadionida bo‘ladigan bahsda Eldordan samarali o‘yin kutib qolamiz.
“Milan” va “Jenoa” bahsi Toshkent vaqti bilan 15:30 da boshlanadi.
Fikrlar