Шомуродов учун янги таклиф берилади!
Элдор Шомуродовнинг янги мавсумни қаерда ўтказиши ҳамон номаълум бўлиб турибди. “Рома” мураббийлар штаби легионеримизни асосий таркиб сафида “Салернитана”га қарши учрашувга олиб келди.
Лекин бу Шомуродовнинг бошқа клубга трансфер қилиш бўйича ҳаракатлар тўхтаганидан далолат бермайди. Чунки римликлар Жозе Моуриньо кўзлаган Андреа Белоттини сафга қўшиб олиш учун Элдор Шомуродовнинг кетишини интизорлик билан кутишмоқда.
Кетиши кутилаётган ҳужумчилар рўйхатида Стефан Эл-Шаарави ва Феликс Афена-Гьян ҳам бор. Лекин трансфер бозорида Шомуродовнинг харидорлари кўпроқ ва ўзбек футболи бўйича таклифлар анча жўяли бўлмоқда.
Яқинда “Трабзонспор” Элдор Шомуродовнинг трансферини сўраб, бир йиллик ижара учун бир миллион евролик таклиф билан “Рома”га мурожаат қилган эди. Бу таклиф билан пойтахтликларни ҳайратга сола олмаган Туркия чемпиони ҳаракатда тўхтамоқчи эмас.
Туркиянинг www.61saat.com сайти хабарига кўра, келаси ҳафта турклар яна “Рома” мутасаддиларига Шомуродов трансфери бўйича мурожаат қилади.
“Трабзонспор” етакчиларидан босниялик Эдин Вишча жароҳат олгани муносабати билан жамоа ҳужум чизиғининг ҳар қандай нуқтасида ўйнай оладиган Элдор Шомуродовни қўлга киритишга алоҳида эътибор қаратмоқда.
Жамоа бош мураббийи Абдуллоҳ Авжи ўзбекистонлик юлдузга жуда қизиқмоқда.
“Рома” ҳам футболчининг трансферига қаршилик қилмаслиги “Трабзонспор”га Шомуродов учун курашни давом эттириш имконини бермоқда.
Келаси ҳафта давомида “Рома” мутасаддилари билан музокара ўтказилади ва Туркия клуби ушбу трансфер бўйича янги таклифини беради, - дейилади www.61saat.com хабарида.
“Трабзонспор” ҳамюртимизни олишга қизиқаётгани бежиз эмас. Жамоа Туркия Суперлигаси ғолиби сифатида Чемпионлар лигасининг плей-офф босқичида қатнашади. Бу босқичда турклар Даниянинг “Копенгаген” клуби билан тўқнаш келади.
Трабзонликлар муҳим баҳс олдидан ва бутун мавсум давомида Элдор Шомуродовдан асосий ҳужумчи сифатида фойдаланмоқчи. Бош мураббий Абдулла Авчи ўзбек ҳужумчисининг имкониятларини яхши билади.
Элдор Шомуродов бир йил муқаддам “Рома” сафидаги илк расмий учрашувини УЕФА Конференциялар лигаси саралаш турнири доирасида “Трабзонспор”га қарши ўтказиб, дебют голини киритган ва жамоасининг ғалабасини таъминлаган эди.
Шомуродов Европа миқёсидаги учинчи халқаро турнир – Конференциялар лигасининг амалдаги ғолиби ҳисобланади.
Турклар келаси ҳафтага мўлжалланган музокараларда “Рома”га маъқул келадиган шартларни топиш билан бирга, Элдор Шомуродовни ҳам Туркияга кўчиб ўтишга кўндириши талаб этилади. Сўнгги маълумотларга қараганда, легионеримиз фаолиятини Италияда давом эттиришни маъқул кўрмоқда. Шу боис, ҳамюртимиз Англия ва Германиядан бўлган чорловларга ҳам қизиқиш билдирмагани айтилди.
Фикрлар