Шомуродовни олмоқчи бўлганимиз ёлғон!
Европа футболини ёритиб борувчи оммавий ахборот воситалари ёзги трансферлар мавсуми якунланиши арафасида А Серия вакилларидан “Лечче” мутасаддилари Элдор Шомуродовнинг трансферини сўраб, “Рома”га мурожаат қилгани ҳақида хабар тарқатган эди.
“Лечче” спорт директори Стефано Тринчера Шомуродов трансфери бўйича хабарларни инкор қилди.
- Элдор Шомуродов бўйича музокаралар бўлгани йўқ. Биз бошқаларга қарамасдан, бор эътиборимизни ўзимиздаги ёш истеъдод эгаларига қаратишга қарар қилдик, - деди Стефано Тринчера.
.jpg?1662190794784)
“Рома” бош мураббийи Жозе Моуриньо жамоанинг асосий тайёргарлик босқичи – Португалияда ташкил этилган мавсумолди йиғинидан кейин Элдор Шомуродовнинг ҳаракатлари унга маъқул келмагани ва легионер Римни тарк этиши кераклигини таъкидлаганидан кейин Шомуродов бир неча клублар нишонига тушди.
Хориж оммавий ахборот воситаларида Италиянинг ўзидан “Сассуоло”, “Сампдория”, “Болонья”, “Торино”, “Салернитана”, “Монца”, “Лечче”, Франциядан “Ницца”, Англиядан “Вулерхэмптон”, Германиядан “Штуттгарт”, Россиядан ЦСКА, Туркиядан “Фенербаҳче”, “Бешиктош”, “Галатасарой”, “Трабзонспор” ва Саудия Арабистонидан “Ал-Ҳилол” сингари жамоалар Шомуродовга қизиқиш билдираётгани ҳақида маълумотлар тарқатилди.
Бу жамоалардан бир нечтаси ўзбек легионери трансфери бўйича римликлар билан музокара олиб борган бўлса, айрим клублар, хусусан, “Сампдория” ва “Вулверхэмптон” худди “Лечче” каби Шомуродовни олишга ҳаракатлар бўлганини рад этди.
Бир неча ҳафта давомида Шомуродов атрофида трансфер хабарлари айланган бўлишига қарамай, ҳамюртимиз “Рома”да қоладиган бўлди.
Рим клуби бош мураббийи Жозе Моуриньо Шомуродов атрофидаги трансфер босими барҳам топганини ва ҳужумчи “Рома”га ёрдам қўлини чўзишга тайёр эканини таъкидлади.
Эслатиб ўтамиз, Элдор Шомуродов “Машъал”, “Бунёдкор”, “Ростов”, “Женоа” ва “Рома” жамоалари сафида жами 221 та учрашувда майдонга тушиб, рақиблар дарвозасини 45 маротаба ишғол қилган ва жамоадошларига 23 та голли узатма оширган.
Шунингдек, Ўзбекистон миллий терма жамоаси сафида жами 53 та беллашувда қатнашиб, ўз ҳисобига 30 та гол ёздириб қўйган.
Фикрлар