Шомуродовнинг ортидан ким боради?
Собиқ Иттифоқ ҳудудига кирувчи мамлакатлар орасида энг кучли чемпионат Россия премьер-лигаси эканига шубҳа йўқ. Аслида Украина чемпионати ҳам бу борада Россияга рақобат қила олмайди. Ҳар ҳолда Украинада “Динамо” ва “Шахтёр”дан бошқа қудратли клублар йўқ ва халқаро майдонда асосан мана шу икки жамоани кўришимиз мумкин.
Россияда эса ўз олдига юқори мақсадларни қўйган жамоалар кўпроқ.
МДҲ давлатларидан етишиб чиқаётган футболчиларнинг аксарияти кўпроқ Россия чемпионатида ўйнашни истайди. Хусусан, Ўзбекистондан етишиб чиқаётган кўп ўйинчиларнинг орзуси рус футболига кириб олиш. Чунки, Россия чемпионатида пишган ва ўзини кўрсатган чарм тўп усталарида Европанинг бошқа жамоаларига ўтиб кетиш имкони кўпроқ бўлади. Хусусан, ўзбекистонлик футбол мухлислари ҳам футболчиларимизнинг Элдор Шомуродов ортидан бориб, Россия футболида ўзини кўрсатиши ва кейин Европанинг кучли чемпионатларига ўтишидан умидвор.
Европа клублари аксарият ҳолларда Россия ёки Украинадан бошқа мамлакатлар чемпионатидан деярли футболчи олмайди.
Кейинги пайтда Россия чемпионатида ўйнаган футболчилар асосан Италия жамоаларидан қўним топаётгани кузатилмоқда. Қизиғи, Россиядан А Серияга йўл олган ўйинчиларнинг аксарияти РПЛга чет элдан келган легионерлардир.
Эътиборингизга Россия премьер-лигасида тўп тепиб, Италия жамоаларига ўтган футболчилар ҳақида маълумот берамиз.
Кристиан Ансальди (“Торино”)
Аргентиналик ҳимоячи “Рубин”да ўйнаган йиллари 128 та учрашувда қатнашиб, бир жуфт гол урган. Кейин “Зенит”да ҳам 9 та баҳсда майдонга тушиб битта тўп киритишга муваффақ бўлди. “Рубин” таркибида икки карра Россия чемпиони бўлган. “Зенит” билан Россия Суперкубогини қўлга киритди. Кейин Элдор Шомуродов каби “Женоа”га ўтди. А Серияда “Интер”да ҳам ўйнади.
Бруну Алвеш (“Парма”)
Португалиялик марказий ҳимоячи 2010-2013 йиллар давомида “Зенит”да 72 та учрашувда бир марта гол ҳам урган ҳолда икки карра Россия чемпиони ва Суперкубок соҳиби бўлган. Португалия, Туркия, Шотландия чемпионатларида тўп тепган. Италияда “Парма”дан ташқари “Кальяри” шарафини ҳам ҳимоя қилган.
Йордан Осорио (“Парма”)
Венесуэлалик ҳимоячи юртидан ташқари Португалияда учта жамоа шарафини ҳимоя қилганидан кейин “Зенит”га таклиф этилди. Питерликлар таркибида еттита ўйинда қатнашганидан кейин ўтган йили “Парма”га ўзтиб кетди. Осорио Венесуэла, Португалия ва Россия чемпиони ҳисобланади.
Эрнани (“Парма”)
Бразилиялик ярим ҳимоячи “Зенит”да жами 23 та учрашувда иштирок этди ва битта гол урди. Бу статистика унинг Россия чемпионлигига эришишига кифоя қилди. Орада Францияда бир мавсум ўйнаб келди. Жорий мавсумда “Парма”да бешта ўйинда учта гол урди.
Элдор Шомуродов (“Женоа”)
Ўзбекистонлик футболчи уч йил давомида “Ростов” шарафини ҳимоя қилди. Ростовликлар таркибида ҳужумнинг исталган нуқтасида ўйнай оладиган форвардга айланди. Ўтган йили “Женоа” ўз сафига қўшиб олган ҳамюртимиз мураккаб чемпионатда жамоасининг ўнта голида бевосита иштирок этди. Элдор дебют мавсумида ҳозирча рақиблар дарвозасини тўрт маротаба ишғол қилди. Шомуродовни “Женоа”дан кучлироқ жамоалар кузатиб бораётгани ҳақида маълумотлар бор.
Доменико Кришито (“Женоа”)
Италиялик ҳимоячи фаолиятини Генуяда бошлаган. “Ювентус”да ҳам маҳоратини кўрсата олган. 2011-2018 йиллар давомида “Зенит”да ўйнаган Кришито 155 та баҳсда 15 та гол урган. Қарийб уч йилдан бери генуликларнинг ишонган футболчиси сифатида тўп тепмоқда.
Александр Кокорин (“Фиорентина”)
Россия футболининг энг истеъдодли ҳужумчиларидан, деб тан олинган Александр Кокорин юлдузлик мавқеини сақлаб қола олмади. Фаолияти пастга шўнғиётган бир паллада “Фиорентина” варианти чиқиб қолди. Кокориннинг А Сериядаги ишлари кўнгилдагидек, деб бўлмайди.
Алексей Миранчук (“Аталанта”)
Бугунги кунда Россиянинг энг кучли футболчиларидан бири ҳисобланган ярим ҳимоячи етти йил Москванинг “Локомотив” жамоаси шарафини ҳимоя қилди. 2020 йилнинг ёзида “Аталанта”га кўчиб ўтди. А Сериядаги дастлабки мавсумида асосан бошланғич таркибга кириш учун курашмоқда. Ҳозирча, Италия чемпионатида 21 та ўйинда учта гол урди.
Никола Максимович (“Наполи”)
Сербиялик футболчининг фаолияти бошқаларникига ўхшамайди. 2013 йили ўз юртидан “Торино”га олиб келган Никола икки йилдан сўнг “Наполи” аъзосига айланди. Неаполь шаҳри жамоасида асосий таркибга киришга қийналган ҳимоячи 2018 йили “Спартак” жамоасига ижарага бериб юборилди. Москваликлар сафида 9 та ўйинда қатнашиб, премьер-лиганинг бронза медалига эга чиқди.
Фелипе Кайседо (“Лацио”)
Эквадор ва Испания фуқаролигига эга ҳужумчи жиддий жамоаларда тўп серган. Европадаги фаолиятини “Базел”дан бошлаган Кайседо “Манчестер Сити”да 27 та ўйинда бешта гол урган. Кейинроқ, Португалия ва Испания клублари шарафини ҳимоя қилди. 2011-2013 йиллари Москванинг “Локомотив” жамоаси таркибида 52 та учрашувда 11 та гол муаллифи бўлди. Россиядан кейин Бирлашган Араб Амирликлари ва Испания чемпионатларида фаолият юритди. 2017 йилдан бери “Лацио”да ўйнамоқда.
Адольфо Гайч (“Беневенто”)
Аргентиналик марказий ҳужумчи катта умидлар билан ЦСКАга олиб келинган эди. Лекин 22 ёшли Гайч рус футболига мослаша олмади. “Армиячлар” сафида 13 та учрашувда қатнашиб, майдонни қуруқ тарк этди. 2021 йилнинг январида Гайч “Беневенто”га ижарага берилди. А Серияда “Специя” ва “Ювентус” дарвозасини ишғол қилиш орқали эътиборга тушди.
Фикрлар