Сречко Катанец: "Бугунги ўйин учун Машарипов олдида шляпамни ечаман, аммо мен Бразилия ёки Аргентина бош мураббийи эмасман..."

ЎЗБЕКИСТОН - Таиланд терма жамоалари тўқнашувидан сўнг томонларнинг бош мураббийлари ўртасида матбуот анжумани ташкил этилди. Унда Ўзбекистон терма жамоаси устози Сречко Катанец иштирок этди.

"Хайрли кеч! Йигитларни муҳим ғалаба билан табриклайман. Мухлисларга ҳам алоҳида миннатдорчилигимни изҳор этаман. Уларнинг қўллаб-қувватлашисиз биз бу босқичга етиб кела олмаган бўлардик!

Биринчи бўлимда яратилган имкониятлардан ҳа деганда фойдалана олмадик. Гол уриш бўйича кўплаб муаммоларга дуч келдик. Вазиятлар йўқ эмас, буни ҳамма кўриб турибди. Бироқ, ҳал қилувчи қисм бизда оқсамоқда.

Ўйинимиздан қониқиш ҳосил қилдим. Муҳими, биз бу босқичдан муваффақиятли ўтиб олдик. Энди бор эътиборни Қатарга қарши кечадиган "жанг"га қаратамиз!

Қатар - шаклланган ва алоҳида кучли томонларга эга жамоа. Шунингдек, улар мусобақанинг амалдаги ғолиби саналади. Шунга қарамай, мен шогирдларимга тўлиқ ишонаман ва уларнинг қўлидан нималар кела олишини яхши биламан.

Тўғри, бизда кўплаб йўқотишлар мавжуд. Бугун ҳам Шукуровнинг хизматидан фойдалана олмадик. Сабаби, у касал эди. Шунингдек, бир қанча футболчиларимиз жароҳат олган ёки дисквалификацияга учраган. Қийин ва машаққатли учрашув бўлиши аниқ. Зотан, энди ҳеч бир баҳс осонлик билан ўтмайди.

Сиз менга нима учун бўйи паст йигитлар майдонда кўп эканини сўраяпсиз? Уларнинг ажойиб ўйин намойиш этаётганини ҳамма кўриб турибди ахир. Бугунги ўйиндан сўнг мен барча шогирдларимнинг ҳаракатини юқори баҳолаган бўлардим. Биз тактик томонлама, ҳам жисмонан, ҳам руҳан ғалабага муносиб ўйнадик.

Охирги 6 оч ичида баъзи футболчиларимиз жуда кам ўйин амалиётига эга бўлган. Жумладан, Жалолиддин Машарипов жароҳатлар ва яна бошқа масалалар сабаб майдонга туша олмай юрди. Шунга қарамай, у ўзидан кутилганидан ҳам яхшироқ ўйин намойиш этиб берди. Мен унинг олдида шляпамни ечаман.

Мен Бразилия ёки Аргентина бош мураббийи эмасман. Қўлдан келган имкониятлардан максимал фойдаланишга ҳаракат қиляпмиз. Камтарроқ бўлишим биз учун анча фойдали бўларди, деб ўйлайман", - деди словениялик мутахассис.