Суперлига. Бу футболчиларга тенг келадигани топилмади

Суперлигада 18-тур якунланди. Бу сафар ҳам ҳар бир жуфтликнинг энг яхшилари аниқланди. Қуйида шу тўғрисида сўз юритамиз.

“Олимпик” – “Турон” (2:0) учрашувининг энг яхши футболчиси: Тимур Мамасиддиқов

Ниҳоят, Тимур Кападзе бошчилигидаги “Олимпик” 18-турга келиб ғалабасиз сериясига барҳам берди. Май ойидан бери рақибларини мағлуб эта олмай келаётган “Олимпик” бу сафар “Турон”ни қабу қилди ва кўплаб имкониятлар яратганига қарамай, жавобсиз 2 та гол эвазига ғалаба қозониб, уч очкони ўз ҳисобига ёздириб қўйди. Голлардан бири Тимур Мамасиддиқовнинг ҳисобига ёзилди ва чин маънода учрашув қаҳрамонига айланди. Зеро, у фаол ҳаракатлари билан майдонда ажралиб турди.

“Бунёдкор” – “Бухоро” (1:2) учрашувининг энг яхши футболчиси: Шохруз Норхонов

“Бухоро” клуби “Бунёдкор”га қарши чинакамига қаҳрамонлик кўрсатди. Лигада жон сақлаб қолиш учун курашаётган меҳмонлар “Бунёдкор” майдонида мардонавор ўйин кўрсатди. Учрашув катта эҳтимол билан 1:1 ҳисобида якун топаётгандек эди. Лекин сўнгги сонияларда Шохруз Норхонов катта саҳнага чиқди ва икки ҳимоячи қуршовидан чиқиб кетиб дарвозани ишғол қилди. Захирадан майдонга тушган ушбу ҳужумчи жамоасининг ўйинини ўзгартира олди ҳам қийин вазиятдан гол уриб кетишни уддалади. Унинг ўрнида бошқаси бўлганида рақиблари қуршовидан чиқиб кета олмаган бўларди, балки...

“Сурхон” – “Насаф” (1:2) учрашувининг энг яхши футболчиси: Шерзод Насруллаев

“Насаф”ни Тошкентда “Сурхон”га қарши оғир ўйин кутаётгани олдиндан аниқ эди. Суперкубокдаги муваффақиятдан кейин “Насаф” бу сафар ҳам оғир бўлишига қарамай, рақибини 1:2 ҳисобида таслим эта олди. Қанот ҳимоячиси Шерзод Насруллаев эса бу сафар ҳам фаоллиги билан ажралиб турди. У рақиблар билан курашда сира қўрқмайди ва ундан ўтиб кетиш ҳам машаққат. Шу сабабли Шерзод “Насаф”нинг ғалабасида алоҳида ўрин эгаллайди.

“Қизилқум” – “Пахтакор” (2:3) учрашувининг энг яхши футболчиси: Одил Ҳамробеков

Навоийда голларга бой ўтган ўйинда “Пахтакор”  3:2 ҳисобидаги ғалабани қўлга киритди. “Шерлар”нинг таянч ярим ҳимоячиси Одил Ҳамробеков рақиб дарвозасини ишғол қилишдан ташқари ўзи ҳам ҳужумларда жонбозлик кўрсатди ва рақиб ҳужумларини бартараф этишда ҳам Одил одилона ўйин кўрсатди.

“Металлург” – “Сўғдиёна” (3:1) учрашувининг энг яхши футболчиси: Забиҳилло Ўринбоев

“Металлург” ўтган турда “Навбаҳор”ни мағлубиятга учратган “Сўғдиёна”ни қабул қилди ва уларни 3:1 ҳисобида енгди. Бу ўйинда айниқса, бекободликлар сардори ва ҳужумчиси Забиҳилло Ўринбоевни тўхтатиш мушкул бўлди. У иккита гол урди ва айниқса, иккинчиси жуда чиройли чиқди. Жамоасининг халоскорига айланган футболчи чин маънода яна “Металлург”нинг энг яхши футболчиси.

“Навбаҳор” – ОКМК (0:0) учрашувининг энг яхши футболчиси: Ботирали Эргашев

Намангандаги марказий учрашувда дарвозалар дахлсиз қолди. Учрашувнинг энг яхши ўйинчиси сифатида ОКМК посбони Ботирали Эргашев эътироф этилди. “Навбаҳор”нинг бир қатор хавфли ҳужумларини бартараф этишда Эргашев тажрибасини намойиш қилди.

“Нефтчи” – “Андижон” (0:0) учрашувининг энг яхши футболчиси: Игорь Литовка

Бу ўйинда ҳисобнинг 0:0 билан якун топишида “Андижон” дарвозабонининг улуши катта бўлди. Чунки Литовка учрашув мобайнида шу қадар аниқлик ва ишончли ўйин кўрсатдики, ўз сейвлари орқали жамоасини муқаррар голлардан сақлаб қолди. Агар уни эмас, балки бошқасини учрашувнинг энг яхши футболчиси деб эътироф этишса бу адолатсизлик бўларди.

Шуҳратбек Жўраев.