Tashkent open: Сабина, Нигина ва Оқгулнинг рақиби аниқ бўлди
Ads
Жорий йилнинг 23-28 сентябрь кунлари Тошкентдаги Республика олимпия захиралари теннис мактабида теннис бўйича хотин-қизлар ўртасида “Tashkent Open – 2019“ мусобақаси бўлиб ўтади.
 
Ўзбекистон Жисмоний тарбия ва спорт вазирлиги, Миллий олимпия қўмитаси, мамлакатимиз теннис федерацияси ва Халқаро хотин-қизлар теннис уюшмаси (WTA) томонидан ўтказиладиган турнирда мамлакатимиз шарафини Сабина Шарипова, Оқгул Омонмуродова ҳамда Нигина Абдураимова ҳимоя қилади.
 
Мазкур мусобақанинг асосий тўр баҳсларига қуръа ташланди. Соврин жамғармаси 250 минг АҚШ долларини ташкил қилувчи турнир ташкилотчилари асосий тўрида тўғридан-тўғри қатнашиш ҳуқуқини берувчи имтиёзли йўлланмани уч нафар теннисчимизга  тақдим этди.
 
Қуръа натижасига кўра, мамлакатимизнинг биринчи рақамли теннисчиси Сабина Шарипова илк даврада черногориялик Данка Ковинич билан баҳс олиб борса, тажрибали спортчимиз Оқгул Омонмуродова бельгиялик Есалин Бонавентурени синовдан ўтказади. Шунингдек, ҳамюртимиз Нигина Абдураимова эса руминиялик Моника Никулескуга қарши кортга чиқадиган бўлди.
 
Эслатиб ўтамиз, мамлакатимизда 21 бора ўтказилаётган ушб мусобақанинг асосий тўр баҳслари эртага 23 сентябрь куни соат 10:00дан бошланади