Тезкор: Шомуродовдан воз кечганимиз йўқ!

Элдор Шомуродов атрофидаги вазият қизғин тус олмоқда. Жозе Моуриньо етарли даражада ўйин амалиёти бермаётган легионеримиз бошқа клубларнинг орзусига айланган.

А Серия дебютанти “Кремонезе” анчадан бери ўзбек ҳужумчисини ўз сафига қўшиб олишга ҳаракат қилмоқда. Кремонеликлар қишки трансферлар мавсуми очилмасидан “Рома”га Элдорни сўраб мурожаат қилган эди.

Италия матбуоти Ўзбекистон миллий терма жамоаси сардори А Серия мусобақа жадвалининг хавфли ҳудудида жойлашган жамоа чорловини қабул қилмаганини ёзган.

Футболга ихтисослашган calciomercato.it сайти журналистлари “Кремонезе” ижрочи директори Арьедо Брайда билан суҳбатда клубнинг Элдор Шомуродовга қизиқаётгани ҳақидаги хабарларга изоҳ беришни сўради.

Таъкидлаш жоизки, Арьедо Брайда футбол соҳасида катта тажрибага эга мутахассислардан ҳисобланади. У фаолияти давомида “Монца”, “Удинезе”, “Сампдория”, “Милан”, “Барселона” клубларида скаут, спорт директори ва ижрочи директор лавозимларида ишлаган.

76 ёшли мутахассис икки йилдан ошиқроқ вақт мобайнида “Кремонезе”ни ривожлантириш борасида иш олиб бормоқда.

Брайда клубнинг ўзбекистонлик ҳужумчини олишни истаётганини тасдиқлади ва вазиятни қуйидагича изоҳлади.

Ҳақиқатан биз Шомуродов трансфери бўйича “Рома”га таклиф билан мурожаат қилдик. Лекин баъзан ўйинчилар реал воқеаликка етарли даражада эътибор қаратмайди.

“Кремонезе” кичик клуб, лекин унинг ажойиб хўжайинлари ва фантастик президенти бор. Футболчилар биз ўзимиз учун муҳим нарсаларга эгалигимизни тушуниб етишлари керак. Албатта, мусобақа жадвалидаги ўрнимиз мақсадларимизга мос эмас. Лекин биз юқори дивизионга лойиқ клуб эканимизни исботлашга ҳаракат қиляпмиз.

Вақти келиб футболчилар ҳам бир таклиф қилганимизда “Кремонезе”нинг иккинчи даражали клуб эмас, чорловимиз жиддий эканини тушиниб етади, - деди Арьедо Брайда.

Юқори дивизион дебютанти бўлган “Кремонезе” А Сериянинг жорий мавсумдаги дастлабки 15 та учрашувида ҳали бирор маротаба ғалаба қозонмаган ягона жамоа ҳисобланади. Массимилиано Альвини шогирдлари чемпионатнинг биринчи ярмида жами еттита беллашувда дуранг қайд этган ҳолда мусобақа жадвалида 18-поғонада ўрнашиб турибди.

Бундан ташқари, “Кремонезе” ҳужум чизиғи энг кучсиз бўлган икки жамоадан бири. Кремонелик футболчилар 15 та ўйинда атиги 11 та тўп киритган. Асосий тўпурар Давид Окереке ҳисобида учта гол бор.

Клуб раҳбарияти жамоанинг олдинги чизиғида ўйнаётган олти нафар футболчининг ўйинидан қониқмаяпти ва асосий ҳужумчи сифатида “Рома”дан Элдор Шомуродовни олиб келмоқчи.

Мавсум бошидан бери А Серия ва Европа лигасида саккиз марта майдонга тушиб, битта гол урган Элдор Шомуродовга “Кремонезе”дан ташқари “Торино”, “Сампдория”, “Фиорентина” ва “Верона” каби клублар ҳам даъвогарлик қилмоқда.

Тезкор: Шомуродовга янги даъвогар чиқди!

Яна бир футболчимиз Европанинг “ТОП-5” чемпионатларига бормоқчи!

Шомуродовнинг трансфери барбод бўлиш арафасида!

Шомуродов Месси бошчилигидаги супертўпурарлар билан бирга!

Тўпурар легионеримиз алмаштириб бўлмас футболчи экан!

Ўзбекистон терма жамоасини енгишга мажбур эмасмиз!