Тўпурар легионеримизни УЕФА мусобақасига чақиришмоқда!
Қозоғистон матбуотининг ёзишича, УЕФА шафелигида ўтказиладиган Конфедерация Лигаси мусобақасида иштирок этадиган "Тобол” клуби ўзбекистонлик легионер Игорь Сергеевни ёрдамга чақирмоқда.
Ўтган йилнинг охирида “Пахтакор” билан шартномаси тугаган Игорь Сергеевни қўлга киритиш учун Қозоғистон премьер-лигаси вакиллари – “Актобе” ва “Астана” анчагина рақобатлашган эди. Бу рақобатда “Актобе” молиявий кафолатлари билан ўзбекистонлик футболчини ўзига оғдириб олди. Игорь Сергеев актобеликлар таркибида энг катта маош оладиган футболчига айланди.
Жамоасининг энг қимматбаҳо ўйинчиси бўлган ҳамюртимиз премьер-лига ўйинларида ўзига билдирилган ишончи жуда тез оқлади. Чемпионатнинг биринчи қисмида рақиблар дарвозасига еттита гол уриб, битта голли пас оширди.
Бироқ, кейинроқ клуб раҳбарияти ўзгарди ва янги келганлар учун Игорь Сергеевдек ҳужумчини ушлаб туриш молиявий томондан қийинчилик туғдира бошлади. Айни пайтда “Актобе” легионеримизни сотиб юбориш орқали молиявий имкониятларини яхшилаб олиш ва муаммоли позицияларга янги футболчиларни таклиф этишни режалаштирмоқда.
Аввалроқ, ҳамюртимизга Шарқий Европа – Польша ва Руминия жамоаларидан таклифлар бўлганди. Шунингдек, Игорь Сергеевнинг агенти унга Англиянинг “Шеффилд Юнайтед” клубидан қизиқиш борлигини ҳам тасдиқлаганди.
Суперлигамизнинг амалдаги чемпиони “Пахтакор” ҳам Ўзбекистон чемпионатлари тарихида жамоа учун энг кўп – 101 та гол урган ҳужумчисини ортга қайтаришга қарши эмас. Айниқса, Эрен Дердийок клубни тарк этганидан кейин тошкентликларда яхши савиядаги ҳужумчига эҳтиёж бор.
Айни пайтда халқаро мусобақада иштирок этишга ҳозирлик кўраётган “Тобол” ҳам Сергеев хизматига жиддий эҳтиёж сезмоқда. Унгача, тўпурар ҳужумчининг хизматларини чемпионлик учун курашаётган “Астана”га таклиф қилишди. Бироқ пойтахтликлар Сергеев йил бошида “Актобе”ни танлаганидан ҳафсаласи пир бўлган шекилли, бу мавзуга қайтишни истамасдан рад жавобини берди.
_2.jpg?1626191713966)
“Тобол” жорий чемпионатда пешқадамлик қилмоқда. Жамоа ички чемпионатда ташқари УЕФА Конференция Лигасида ҳам қатнашади. Бу Еврпа футбол уюшмалари федерациясининг Чемпионлар лигаси ва Европа лигасидан кейинги учинчи турнири ҳисобланади.
“Тобол” ушбу турнирнинг иккинчи босқичидан қўшилади ва Хорватиянинг “Хайдук” клубига қарши майдонга тушади. Жамоалар 22 ва 29 июль кунлари ўзаро иккита учрашув ўтказади.
Эслатиб ўтамиз, Игорь Сергеев “Пахтакор” клуби тарбияланувчиси ҳисобланади. У пойтахт жамоасидан ташқари Хитойнинг “Бейцзин Гоань” (14 та ўйин ва битта гол) ҳамда Бирлашган Араб Амирликларининг “Аз-Зафра” (10 та ўйин битта гол) жамоалари шарафини ҳам ҳимоя қилган.
Моҳир тўпурар Ўзбекистон миллий терма жамоаси сафида 54 та учрашувда қатнашиб, рақиблар дарвозасини 17 маротаба ишғол этган.
Сергеев ҳали “Тобол” томонидан бўлаётган таклифга муносабат билдирганича йўқ.
Фикрлар