Тўраев: "Суперлигадан таклифлар бўлмаётгани сабабли хорижда ўйнаяпман"

Хабарингиз бор, куни кеча Тожикистон олий лигасида 2-поғонада бораётган Хўжанднинг “Эсхата” клуби “Андижон”га қарши назорат учрашувида иштирок этди. 1:1 ҳисобида якун топган беллашувда “Эсхата” жамоасидан жавоб голини ўзбекистонлик ҳужумчи Акобир Тўраев киритди.

Мухлислар ушбу ҳужумчимизни яхши эслашса керак. Охирги пайтларда четда тўп суряпти. “Бухоро” футбол мактаби тарбияланувчиси ҳисобланади. Шу кунгача “Бухоро”, “Пахтакор”, “Машъал” сингари жамоаларимизда тўп сурди. Шунингдек, Ҳиндистон, Бангладеш, Қирғизистон ва Тожикистон биринчиликларида ҳам ўйнади.

Масалан, “Эсхата”да илгари ҳам фаолият олиб борган. У яна собиқ клубига қайтмоқда. “Андижон”га қарши баҳсдан кейин Тўраев билан мулоқотга киришдик.  

“Бу жамоа билан шартнома имзолаганман”

- Аслини олганда йил бошида ҳам шу ерда эдим, - дея гап бошлади, Акобир. - Фақат мени заявка қила олмадилар. Ўтган йили Қирғизистон чемпионатида ўйнадим. Негадир ўшанда хужжат ишлари билан боғлиқ масала туфайли рўйхатдан ўтказолмадилар. Натижада икки ой уйда юрдим. Кейин “Эсхата”дагилар чақириб қолишди ва яқинда келдим. Бу жамоа билан имзоланган шартномам бор, йил бошида тузилган. Кўтарма пулини учдан бир қисмини олганман.

“Шу ерда қолишим шарт”

- Тожикистон чемпионатининг биринчи давраси тугашига иккита тур бор. Мураббийлар билан гаплашсам, шундан кейин 10 кунлик таътил бўларкан. Ҳозирча аниқ гапиришмади. Рости, менга бошқа жойлардан таклиф бўлгани йўқ. Шу ерда қолишим шарт. “Андижон” билан учрашувга тўхталадиган бўлсам, барибир машғулот билан ўйин бошқа. Суперлига вакилига қарши яхши ўйин бўлди. Ўйнамаганим анча билинди. Фаолиятимда охирги бир йилда ўйин амалиётим кам бўляпти, бунга жароҳатлар ҳам сабаб.

“Суперлигада ҳам ўйнайман”

- Тўғрисини айтадиган бўлсам, 3-4 йилдан бери Ўзбекистон Суперлига клубларидан таклиф келиб тушмаганлиги сабабли хорижда ўйнаяпман. Чунки менга четдан таклифлар бўлиб туради. Ҳиндистон, Бангладеш, Қирғизистон, Тожикистон каби чемпионатларда ўйнаб келяпман. Худо хоҳласа, Суперлигамизда ҳам ўйнайман. Ҳаммаси яхши бўлади.

“Эсхата”ни мақсади ОФК Кубогида иштирок этиш”

- Тожикистон чемпионатини ўзингиз ҳам кўрдингиз, югуришади, тепишади, ҳаракат қилишади. Ҳамма клублари курашувчан. “Эсхата” бош мураббийи ва раҳбарият максимал вазифа қўйган. ОФК Кубогида иштирок этиш мақсади бор. Россиялик мураббийнинг режалари бор ва бу борада ҳаммаси жойида. Клубда ички муҳит ҳам яхши. Мураббий асосан тартиб-интизомга жиддий қарайди”, - дейди Тўраев.

Шуҳратбек Жўраев.