Transfermarkt ҳамманинг эътиборини Файзуллаевга қаратди!
Жаҳон футболида transfermarkt.world порталининг аҳамияти беқиёс. Европанинг қудратли клублари ҳам трансфер сиёсатини шакллантиришда ушбу портал маълумотларига таянади.
Трансферларга ихтисослашган ушбу портал экспертлари ҳар бир мамлакат футболини синчковлик билан кузатиб, таҳлил қилиб боради.
Россия Премьер-лигаси якунлангани муносабати билан transfermarkt.world мутахассислари мавсум давомидаги кузатувлар ва таҳлиллар асосида ўз талқинига кўра, чемпионат қаҳрамонлари номини эълон қилди.
Ушбу ташкилот учта муҳим номинация – “Йилнинг энг яхши футболчиси”, Йилнинг энг яхши ёш футболчиси” ва “Йилнинг энг яхши бош мураббийи” йўналишлари бўйича ғолиблар номини эълон қилди.
Унга кўра, якунланган мавсумда Россиянинг энг яхши футболчиси “Динамо” вакили Константин Тюкавин бўлди.
"Динамо" Москвани учинчи ўринга кўтарган Марцел Личка энг яхши бош мураббий, деб танланди.
Transfermarkt портали экспертлари Ўзбекистон миллий терма жамоаси ва ЦСКА вакили Аббосбек Файзуллаевни Россия Премьер-лигасининг энг яхши ёш футболчиси сифатида эътироф этди.
Константин Тюкавин transfermarkt.world портали ҳисоб-китобларига кўра, Премьер-лига ва мамлакат кубогида жами 38 та учрашувда қатнашиб, 15 та гол ва 10 та ассист муаллифи бўлган.
21 ёшли футболчи бугунги кунда 12 миллион еврога баҳоланмоқда. Унинг “динамочилар” билан шартномаси 2028 йилнинг ярмигача давом этади.
Марцел Личка ўтган йили ёзда “Динамо”ни қабул қилиб олганди. 46 ёшли чехиялик мутахассис қўл остида пойтахт жамоаси чемпионат ва кубок ўйинида жами 41 та учрашув ўтказиб, 22 та ғалаба, 8 та дуранг ва 11 та мағлубият қайд этди.
Личканинг “Динамо” билан тузган шартномаси 2025 йилнинг 30 июнига қадар мўлжалланган.
Нуфузли порталда Аббосбек Файзуллаев Россия Премьер-лигаси ва мамлакат кубогида жами 32 та баҳсда рақиблар дарвозасини беш маротаба ишғол қилиб, жамоадошларига 14 та голли пас узатгани қайд этилган.
20 ёшли легионеримизнинг трансфер суммаси айни пайтда 5 миллион еврони ташкил қилмоқда. ЦСКА ҳамюртимиз билан 2026 йилнинг ярмига қадар шартнома тузган. Томонлар келишувига кўра, ҳамкорлик яна бир йилга узайтирилиши мумкин.
Фикрлар