Трентни қўлдан чиқарган “Ливерпуль” Муҳаммад Салоҳ бўйича муҳим қарорга келди

“Ливерпуль” таркибида ёзда жиддий ўзгаришлар рўй бериши кутилмоқда. Клуб билан ҳамкорлиги 30 июнь куни якунланадиган юлдузлардан Трент Александер-Арнольд келажаги бўйича бир қарорга келиб бўлди.

26 ёшли қанот ҳимоячиси жамоада қолмайди ва фаолиятини “Реал”да давом эттиришга қарор қилган.

Бу воқеадан кейин “Ливерпуль” раҳбарияти эркин агентга айланиш арафасида турган Муҳаммад Салоҳ масаласига жиддий эътибор қарата бошлади.

Masrawy нашрининг ёзишича, ливерпулликлар мисрлик тўпурарга ўта манфаатли шартнома таклиф қилган ва шундан сўнг томонлар ўртасидаги музокараларда ижобий силжишлар кузатила бошланди.

Муҳаммад Салоҳ жорий мавсумда жамоа муваффақиятларида муҳим роль ўйнаяпти. 32 ёшли тўпурар барча турнирларда 43 та ўйин ўтказиб, 32 та гол ва 22 та ассист муаллифи бўлди.