ЦСКАни Файзуллаев ушлаб турибди ёхуд экспертлар Аббоснинг ўйинини қандай баҳолаяпти?
Аббосбек Файзуллаев Россия Премьер-лигасининг энг омадли трансфери сифатида эътироф этилмоқда. Чемпионатнинг 14-турида ҳам легионеримиз “Нижний Новгород” дарвозасига киритилган жамоасининг икки голида бевосита иштирок этди.
_1.jpg?1699207277843)
Ўйинда 3:2 ҳисобида зафар қучган ЦСКА футболчилари мусобақа жадвалида учинчи ўринга кўтарилиб олди.
Беллашувдан кейин “Нижний Новгород” бош мураббийи Сергей Юрандан журналистларнинг “Мағлубиятга шогирдларингизнинг индивидуал хатолари сабаб бўлдими ёки Аббосбек Файзуллаевнинг кучли ўйиними?”, деган саволига қуйидагича жавоб берди.
- Аббосбек Файзуллаевнинг тезлик олишига йўл қўймаслик керак эди. Футболчиларимизга тезкор реакция ва интенсивлик етишмади. Файзуллаев тезкорлигини намойиш қилди. Ҳимоячилар унга имкон қадар яқин ўйнаб, жой қолдирмаслиги керак эди, - деди Сергей Юран.
ЦСКА собиқ футболчиси Владимир Пономарёв Аббосбек Файзуллаевнинг “Нижний Новгород”га қарши ўйинини қуйидагича баҳолади.
- Ҳисоб қандай бўлишидан хавотирга тушганим йўқ. Жамоа эртами, кечми бошқача ўйнай бошлашини билардим. Биринчи бўлимда, “армиячилар” жуда содда ўйнади, осон ғалабага ишонди шекилли. Оқибатда, рақиб икки марта ҳисобда олдинга ўтиб олди.
Иккинчи бўлимда ўйин умуман бошқача кетди. ЦСКА энди қанотлардан ўйнашга кўпроқ эътибор қаратиши керак. ҳозир ҳамма марказдан ҳужум уюштиришга ўтиб олган. Кўпчилик бурчак зарбасидан гол уришга ишониб қоляпти.
Мана Файзуллаев пайдо бўлди ва чап қанотда қандай ўйнаш кераклигини кўрсатиб қўйди. Аббос иккита голни яратиб берди. Энди ўнг томондан шунақа ўйнайдиган футболчини топиш керак. Умуман олганда, ЦСКА ғалабага муносиб ўйнади, тўпга кўпроқ эгалик қилди, тезкорлик кўрсатди, - деди Владимир Пономарёв.
ЦСКА тарихидаги энг кучли ўйинчилардан бўлган Евгений Алдонин ҳам ўзбек легионерининг жамоадаги ўрни беқиёс эканини таъкидлади.
- ЦСКА учун жуда мураккаб ўйин бўлди. Бу вазиятда мусобақалар тақвимининг тиғизлиги ва таркибда муаммолар борлигини ҳам инобатга олиш керак.
Уй учрашувларда жамоада ҳар томонлама устунлик қилишини кутамиз. Лекин “Нижний Новгород”га қарши баҳда икки марта натижани қутқаришга тўғри келди.
Владимир Федотов жамоанинг ўйин услубига ўзгаришлар киритди ва бу ўз самарасини берди, футболчилар имкониятдан фойдаланиб қолди.
Мен учун учрашувнинг энг яхши футболчиси Аббос Файзуллаев бўлди. Айни пайтда Аббос бутун жамоани ушлаб турибди, у доим жамоадошларини олға бошлаяпти, ажойиб дриблинг ва аниқ пасларга эга ўйинчи экан, - деди Евгений Алдонин.
Аббосбек Файзуллаев Россия Премьер-лигаси ва мамлакат кубоги доирасидаги 13 та учрашувда ўз ҳисобига битта гол ва олтита ассист ёздириб қўйди.
Фикрлар