Файзуллаев Португалия, Ниделандия грандлари, турклар ва араблар таклифларини қабул қилмади

Ўзбекистоннинг энг машҳур легионерларининг аксариятига  Prosports Management консалтинг компанияси хизмат кўрсатади. Қаҳҳор Мўминов ушбу компания орқали бир неча футболчиларимиз трансферини амалга оширган мутахассис. У sport24.ru  сайтига берган интервьюсида Аббосбек Файзуллаев ҳақидаги саволларга жавоб берди.

— Аббос Москвадаги фаолиятини мана шундай зўр бошлашини тасаввур қилганмисиз?

— Агар биз унинг фаолияти шу даражада яхши бошланишини кутгандик, десам ёлғон бўлиб қолади. Биз – ProSports Management компаниясидагилар Аббос унга берилган имконият ва билдирилган ишончдан, бош мураббий Владимир Федотов билан ишлашдан оқилона фойдаланяпти, деб биламиз.

Жамоада Аббосни илиқ қабул қилишгани муҳим омил. Игорь Акинфеев ва бошқа фахрий ўйинчилар уни ўз қарамоғига олди ва ҳар томонлама ёрдам беряпти. Муваффақиятли ўйинлардан кейин уни алоҳида меҳр билан табриклашяпти. Клубнинг қолган ходимлари ҳам худди шундай муносабатда. Булар Файзуллаевни илҳомлантиради. Қолаверса, Файзуллаевга кийим олмаштириш хонасида жамоа сардори ёнидан жой беришди. Бу ҳам фахрланадиган жиҳат.

— Аббос кимлар билан кўпроқ мулоқот қилади?

— Ҳамма билан муносабати яхши. Саша Зделар ва Виктор Давила билан сал кўпроқ гаплашади.

— Ие, нега айнан улар билан?

— Ҳаммаси оддий. Файзуллаев инглиз тилини жуда яхши билади. Бунинг учун амакисига раҳмат – Аббоснинг болалигидан чет тилини билиш муҳимлигини айтиб келган. Ҳозир Аббос хорижлик легионерлар билан мулоқот қилишида ҳеч қандай тўсиқ йўқ. У Давилага рус тилини ўрганишда ёрдам беряпти.

— ЦСКА Файзуллаев учун трамплинми?

— Бу ҳақида гапиришга ҳали эрта. Аббос ҳозирча бир нечта яхши ўйин ўтказди холос. ЦСКАда рақобат ўта кучли бўлмагани ва бу ерда ўзини кўрсатиш учун имконият кўпроқ экани бизни қониқтирди.

Аббос қачон асосий таркибнинг муқим ўйинчисига айланса ва ЦСКАга совринларни олишда ёрдам берса, у ёғини яна кўрамиз.

Ўзбекистондан келган ва янги ном бўлган ёш ўйинчисига ишонч билдиргани учун клубга катта раҳмат. Кейинги қадамларнинг ҳаммаси раҳбарият билан ҳамкорликда ташланади. Бахтиёр Зайнутдиновнинг фаолияти Аббосни янада яхшироқ ишлашга ундаши керак.

— Файзуллаев мавсумни Россиядан бошқа жойда бошлаши мумкинмиди?

— Аббосга Португалия чемпионатининг кучли бешлигидаги жамоадан чорлов бўлди. Нидерландиядан ҳам таклиф бўлганди. Бироқ у ерда 21 ёшгача бўлган футболчиларнинг маошига чеклов борлиги бизга тўғри келмади.

Турклар ҳам тинч қўймади. Суперлиганинг барча етакчи клублари биз билан мулоқот қилди. Қўшимчасига Яқин Шарқдан бир неча клуб таклиф билан чиқди. Биласизми, уларнинг аксарияти шубҳа билан қараган бир масала бор?

— Нима экан?

— Ўзбек лигасининг рақобатбардошлиги. Аббоснинг кучли бешлик лигаларида ўйнаш орзусини инобатга олиб, биз Россия Премьер-лигаси олдинга қадам ташлаш учун энг маъқул вариант экан, деган қарорга келдик. Бунга Элдор Шомуродов, Хвича Кварацхелия ва Арсен Захарян мисоллари умид уйғотяпти.

Футболчиларимизни “Бавария” скаутлари кузатди...

Файзуллаев: Бошида мени ортга қайтариб юбормоқчи бўлишган эди...

Шомуродов бошқа лигага ўтиши мумкин

Файзуллаев Португалия, Ниделандия грандлари, турклар ва араблар таклифларини қабул қилмади

Файзуллаевни эмас, Мессини мақтанг!

Файзуллаев мени қаттиқ хафа қилди