Тухель Роналдунинг трансферига муносабат билдирди

“Манчестер Юнайтед” ҳужумчиси Криштиану Роналдунинг “Челси”га ўтиши ҳақида кўп хабар тарқатилмоқда.

“Аристокартлар” бош мураббийи Томас Тухель бунга муносабат билдирди.

- Албатта, мен жамоага яна битта зўр ҳужумчи керак эканини инкор қила олмайман. Лекин айни пайтда бизни бошқа муҳим масала безовта қиляпти. Ҳозир энг долзарб мавзу жамоамиз учун ҳимоячилар зарурлигидир. Буни ҳамма кўриб турибди. Биз энг зўр ўйинчиларимиздан айрилдик, энди уларнинг ўрнини тўлдириш керак, - деди 48 ёшли Томас Тухель.

Роналду масаласи эса ҳамон очиқлигича қолмоқда. Ўтган мавсумда манчестерликлар сафида 38 та учрашувда 24 та тўп киритган португалиялик юлдуз Чемпионлар лигасида иштирок этадиган жамоага ўтмоқчи.

“Манчестер Юнайтед”нинг янги бош мураббийи Эрик тен Хаг Роналду келаси мавсумда ҳам жамоада қолишини таъкидлади.