Тухель трансферимизни барбод қилди

“Челси” марказий ҳимоячиси Хавьер Мбуямбанинг агентлари бош мураббий ва клуб раҳбариятининг қароридан норози бўлмоқда.

Мбуямба “Барселона” тарбияланувчиси ҳисобланади. Истеъдодли футболчи кўпроқ ўйин амалиётига эга бўлиш учун Каталония клубидан “Челси”га ўтганди. Томас Тухель ёшлар жамоаси етакчиси бўлган ҳимоячини биринчи таркибга киритмади.

Хавьер Мбуямбага бошқа клублардан таклифлар бор. Лекин “аристократлар” жамоада жароҳат олаётган ва коронавирусга чалинаётганлар кўплиги боис ёш ўйинчининг кетишига йўл қўймаяпти.

Ҳимоячининг манфаатларини ҳимоя қилаётган мутахассислар Тухель уни ўйнатмаётгани ва бу етмаганидек кетишига рухсат бермаганидан кескин норози.

- Бизга Британия ва Нидерландиядан жўяли таклифлар тушганди. Лекин “Челси” уларнинг барини блоклади. Бу ўйинчига нисбатан ғирромликдир, - деди агент.

Энди қишки трансферлар вақти ўтди. Мбуямба ёзда биринчи жамоага жалб қилинмаса, агентлари унга бошқа клуб излашига тўғри келади.