Валерий Кичин: "Футболда яхши ўйин учун очко берилмайди"

“Локомотив” клубининг қирғизистонлик легионери Валерий Кичин яқинда ўз мамлакати терма жамоаси таркибида Ўзбекистонга қарши майдонга тушганини биласиз.

У “Локомотив” сафида ҳам ишончли ўйинлар намойиш қилмоқда. Жамоаси билан куни кеча Андижонда муҳим ғалабани қўлга киритдилар.

Валерий Кичин эса Sports.uz учун интервью берди.

- Ғалаба билан табриклаймиз. Андижонлик мухлислар мағлубиятни кутишмаганди. Учрашув ҳақида нима деган бўлардингиз?

- Табрик учун раҳмат. Қийин ўйин, курашларга бой бўлди. “Андижон” ҳам яхши қаршилик кўрсатди. Биринчи бўлимда бизда имкониятлар кўпроқ бўлди ва яхшироқ ҳаракат қилдик. Иккинчи бўлимда “Андижон” фаолроқ ўйнади. Иккинчи бўлим бошида гол урганимиздан кейин “Андижон” ҳисобни тенглаштириш учун бизга нисбатан қаттиқроқ ҳаракат қилди. Биз ўз вазиятларимиздан унумли фойдаландик. “Андижон” жиддий қаршилик кўрсатганига қарамай, биз аниқроқ ҳаракат қилиб, ғалабани ўз томонимизга оғдирдик.

- Алоҳида рақибнинг ўйини ҳақида нима дея оласиз?

- Жуда яхши ва ҳужумкор жамоа. Ўзбекистондаги ҳар қандай клубга “Андижон” майдонида тўп суриш анча мураккаб. Қанотлардан тезкор ҳужумга ўтиши ва ҳужумкорликни яхши кўришини айтишим мумкин. Умуман олганда, “Андижон” кучли ва яхши жамоа экан.

- Мухлислар ҳақидачи? Қандай фикрдасиз?

- Ооо, “Андижон” ишқибозлари алоҳида мавзу. Табиийки, андижонлик мухлислар ҳақида фикрларим жуда ижобий. Айниқса, перформансларни кўтаришлари, ҳайқириқлар стадиондаги муҳитни ўзгартириб юборди. Андижонлик фанатлар ўз фаоллиги билан кучли мухлислик қилишди. Менга бундай муҳитда тўп суриш ниҳоятда ёқади. Уйдами, сафардами фарқи йўқ, асосийси, мана шундай муҳитда ўйнашни яхши кўраман. Андижонлик ишқибозларга юқори даражада мухлислик қилишгани ва стадиондаги супер муҳит учун ўз миннатдорлигимни билдираман.

-  Яқинда Қирғизистон терма жамоаси сафида Ўзбекистонга қарши майдонга тушдингиз. Терма жамоангизга нима етишмади?

- Нима дейишим мумкин? Ҳужумдаги тартиб етишмади: аниқлик, ишончли ҳаракат.

- Кўрдикки, Қирғизистон яхши ҳаракат қилди...

- Футболда яхши ўйин учун очко берилмайди (кулади). Ҳимояда ҳам, ҳужумда ҳам аниқроқ ҳаракат қилишимиз керак эди. Эрон ва Ўзбекистон каби термаларга қарши хато қилмасдан тўп суриш жуда муҳим.