Виктор Кумиков Ўзбекистонга келиб, кетолмай қолди

Россиялик тажрибали мутахассис, ҳозирда ҳеч бир клубни бошқармаётган Виктор Кумиков яқинда Ўзбекистонга ўзининг қадрдонлари билан кўришиш мақсадида келганди. Аммо кейинчалик юртимизда карантин жорий этилиб, бошқа мамлакатлар билан барча авиарейслар бекор қилинганидан сўнг Кумиков юртига жўнаб кетишга улгурмай қолган. Натижада Виктор Балютович юртимизда қолиб кетди. Айни пайтда у Янгиерда истиқомат қилиб турибди.

Яқинда ушбу мутахассис билан суҳбат уюштирганимизда Навоийга бориб, "Қизилқум" раҳбарлари билан гаплашганини, аммо бу учрашув таклиф доирасида, иш юзасидан бўлмаганини таъкидлаганди. Шуни айтиш керакки, ҳозирда Кумиков эркин агент мақомига эга. Шундай экан, у юртимиздан бўладиган бошқа таклифларни ҳам кўриб чиқишга тайёр. 

Эслатиб ўтамиз, Кумиков бунга қадар юртимизда "Машъал", "Насаф" ҳамда АГМК жамоаларини бошқарган.