Винисиус АПЛ клубига ўтишни истисно қилмади

Футбол инсайдери Экрем Конурнинг маълум қилишича, Винисиус Жуниорнинг вакиллари аллақачон Англия Премьер-лигасининг бешта клуби билан боғланиб, футболчи эҳтимолий трансфер вариантларини кўриб чиқишга тайёр эканини етказган. Хабарларга кўра, айрим жамоалар билан дастлабки мулоқотлар ҳам ўтказилган.

Манбалар таъкидлашича, вазият ривожини "Челси" жуда диққат билан кузатиб бормоқда. Лондон клуби Винисиус трансфер бозорига чиқадиган бўлса, йирик битимни кўриб чиқишга тайёр экани айтилмоқда.

25 ёшли бразилиялик ҳужумчи ўтган мавсумда "Реал" сафида барча мусобақалар доирасида 53 ўйин ўтказиб, 22 та гол урди ва 14 та голли узатма муаллифига айланди. Унинг мадридликлар билан амалдаги шартномаси 2027 йил ёзигача мўлжалланган.