Вирц "Манчестер Сити"га эмас, Испанияга йўл олиш эҳтимоли юқори

"Байер" яримҳимоячиси Флориан Вирц келажакдаги трансфери борасида ўз рейтингини шакллантирган. "Bild" нашрининг хабар беришича, футболчи янги жамоа танлашда Чемпионлар лигасини ютиш имконияти ва "Олтин тўп"ни қўлга киритиш эҳтимолига асосланади.

Аcосий фаворит – "Реал Мадрид". Вирцни клуб тарихи, совринлар сони ва дунёдаги энг яхши футболчига айланиш имконияти жалб қилмоқда. Шунингдек, у Хаби Алонсо билан "Реал"да яна бирга ишлаш эҳтимолини ҳам эътиборга олган — агар Карло Анчелотти ёзда жамоани тарк этса.

Иккинчи ўринда – "Манчестер Сити". Пеп Гвардиола Вирцни анчадан буён кузатиб келмоқда ва айтилишича, шахсан уни Кевин де Брюйненинг вориси сифатида кўраётганини билдирган. "Сити" 150 миллион еврога баҳоланаётган трансфер ва юқори маошни таъминлаш имкониятига эга.

"Бавария" эса Вирц учун унчалик қизиқарли эмас. Ҳатто клубнинг фахрий президенти Ули Хенесс шахсан футболчининг отаси билан учрашганига қарамай, Вирц Мюнхен жамоасига ўтишни ҳозирча маъқул кўрмаяпти.

Футболчининг "Байер" билан амалдаги шартномаси 2027 йилгача тузилган. Германия чемпиони уни сақлаб қолишни хоҳламоқда. Шу билан бирга, Вирцнинг Леверкузенда қолиш эҳтимоли ҳам йўқ эмас.