Хави "Атлетико"га қарши ўйиндан сўнг: "Биз "Барселона"миз! Бу ерда ҳеч ким дам олмайди"

Ла Лиганинг 29-турида "Барселона" "Атлетико" майдонига сафар қилиб, 0:3 ҳисобида ғалаба қозонди. Мазкур баҳсдан сўнг каталонияликлар бош мураббийи Хави Эрнандес ўз фикрлари билан ўртоқлашди. 

"Балки бу жорий "Барселона"нинг энг яхши ўйинидир. Мазкур учрашув "Наполи" билан кечган баҳсга ўхшаб кетди. 

Биз вазиятни яхши тушундик, йигитлар фаол ҳаракатлари билан ажралиб турди. Бўш ҳудудлардан ҳам унумли фойдалана олдик ва ўз ўйин фалсафамиз бўйича ажойиб ўйин намойиш этдик. 

Биз "Барселона"миз! Бу ерда ҳеч ким дам олмайди. Футболчилар ҳар қачонгидан кўра кўпроқ масъулиятли бўлиши лозим. Сабаби, олдинда жиддий синовлар кутиб турибди. 

Янада яхшиланишга ва олдимизда турган икки совринни қўлга киритишга бор кучимизни сарфлаймиз. Ҳамма бу мақсад йўлида бор кучини ишга солиши даркор", - деди испаниялик мутахассис.