Холанд Нодирбек Абдусатторов ўйнайдиган жаҳон чемпионатига пул тикди

“Манчестер Сити” клуби ва Норвегия терма жамоаси ҳужумчиси Эрлинг Холанд шахматга инвестиция кирита бошлаганини эълон қилди.

25 ёшли футболчи ўзининг юртида ўтказиб келинадиган юқори нуфузли Norway Chess (2013 йилдан буён Ставангерда ўтказиб келинаётган халқаро шахмат турнири) ҳамда янги форматдаги Total World Chess Championship мусобақасига маблағ киритади.

Норвегиялик тадбиркор Мартен Борге билан биргаликда Холанд  Chess Mates компаниясини ташкил қилди ва футболчи Норвегия шахмат федерациясининг йирик акциядорига айланади.

- Шахмат — ажойиб ўйин. У ақлни ўткирлайди ва футбол билан ўхшаш жиҳатлари кўп. Тез фикрлаш, интуицияга ишониш ва бир неча қадам олдинни ўйлаш керак.

Мен Norway Chess турнирига инвестиция киритяпман, чунки Total Chess World Championship Tour шахматни бутун дунё бўйлаб янада оммабоп спортга айлантира олишига ишонаман. Norway Chess жамоаси аллақачон катта иш қилди ва лойиҳага қўшилиш имкониятини қўлдан бой бериш жуда қийин эди, - деди Холанд.

Total Chess World Championship Tour йил давомида тўртта шаҳарда ўтадиган тўртта турнирдан иборат бўлади. Унинг якунига кўра классик шахмат, рапид ва блиц йўналишлари бўйича ягона жаҳон чемпиони аниқланади. Ушбу мусобақалар ФИДЕ томонидан камида 16 йилга маъқулланган.

Хабар қилинишича, мусобақанинг мукофот жамғармаси камида 2,7 миллион доллар бўлади. Турнирнинг синов варианти 2026 йил кузида ўтказилади, 2027 йилда эса тўлиқ мавсум бошланади.

Айни пайтда Total Chess World Championship синов турнирида қатнашадиган бир неча юқори классли шахмат усталари номи аниқ бўлиб улгурди. Улар орасида Ўзбекистоннинг энг кучли гроссмейстерларидан Нодирбек Абдусатторов ҳам бор.

Ҳамюртимиз 2025 йили блиц бўйича жаҳон чемпионатида финалга чиқиб, кумуш медаль билан тақдирланган ва Нодирбекнинг бу натижасини янги форматдаги жаҳон чемпионатига йўлланма берди.

Европадаги легионеримиз фаолияти ҳали бошланмай тугадими?

Европаликлар Ҳусановдан ҳайратда!