Ёзги таътилга чиққан "Андижон"нинг режаси қандай?

4 июль куни Ўзбекистон Кубоги нимчорак финал босқичида сафарда “Олимпик” жамоасига қарши ўйиндан кейин “Андижон” клуби аъзолари ёзги танаффусга чиқди. Бу ҳақида клуб матбуот хизмати хабар бермоқда.

Маълум бўлишича, футболчиларга бир неча кунлик хордиқ берилди ва жамоа аъзолари иккинчи даврага тайёргарликни 12 июлдан Тошкентда бошлайди. Футболчилар ёзги йиғинга киришишдан аввал 11-куни тиббий кўрикдан ўтадилар.

Пойтахтдаги машғулотлари 25 июлга қадар давом этади. Ушбу йиғин доирасида бир қатор назорат ўйинлари ўтказилиши режалаштирилган. Рақиблар тўла-тўкис аниқ бўлгач, бу хусусида албатта маълумот берилади.

Хабарингиз бор, 2 июлдан ёзги трансфер ойнаси очилган. Барча мухлисларни таркибда қандай ўзгаришлар юз бериши қизиқтираётгани табиий. Айни пайтда клуб раҳбарияти айрим позицияларни янада кучайтириш мақсадида легионер ҳамда маҳаллий футболчилар билан музокаралар олиб бормоқда. Шу билан бирга жамоамизни тарк этадиган ўйинчилар ҳам йўқ эмас. Бу борада барча хужжатлар тўлиқ охирига етказилгач, расмий хабар берамиз, - дейилади клуб матбуот хизматининг баёнотида.