Zidan "ketmoni uchmagan" hujumchidan voz kechadi

“Real” hujumchisi Luka Yovich ketma-ket ikkinchi yil imkoniyat berilishiga qaramay, bosh murabbiy Zinedin Zidan ishonchini qozona olgani yo‘q. Serbiyalik futbolchi hozir ham asosiy tarkibga kira olmayapti.

Uning faoliyatini kuzatib borayotgan Angliyaning ikki klubi 22 yoshli hujumchini o‘z tarkibida ko‘rmoqchi. “Lester” va “Vest Xem” qishki transferlar vaqtida uni premer-ligaga olib kelishni maqsad qilgan. “Real” ham Yovichni keyinchalik sotib olish huquqi bilan ijaraga jo‘natishga tayyor.

Yovichni olishda “Vest Xem”ning imkoniyati yuqori baholanmoqda. Chunki bu jamoa vakili  Sebasten Aller Yovich bilan birga “Ayntraxt”ning hujum juftligini tashkil qilgan.

“Real” Yovichni 2019 yili 60 million evroga sotib olgan edi. Shundan buyon 31 ta o‘yinda maydonga tushgan hujumchi raqib darvozasini atigi ikki bor nishonga oldi xolos.