Ana xolos: O‘zbekistonning chorak finaldagi raqibi Frantsiya jahon chempionatidan chetlatilishi mumkin!

Indoneziyada 17 yoshgacha bo‘lgan futbolchilar o‘rtasidagi davom etayotgan jahon chempionatida kutilmagan vaziyat yuzaga keldi.

Ma’lumki, dunyoning bu yosh toifasidagi eng kuchli terma jamoalari ishtirok etayotgan musobaqada chorak finalchilar nomi aniq bo‘ldi.

O‘zbekiston terma jamoasi nimchorak final uchrashuvida musobaqada chempionlikka da’vogar hisoblangan Angliya futbolchilarini 2:1 hisobida mag‘lubiyatga uchratib, shov-shuv ko‘tardi.

Hamyurtlarimiz chorak finaldagi raqibi Frantsiya va Senegal terma jamoalari o‘rtasidagi uchrashuvda aniqlandi. O‘yinda hisob ochilmagani bois, bahs g‘olibi penaltilar seriyasidan aniqlandi va unda Evropa vakillari 5:3 hisobida g‘olib chiqdi.

Frantsiya terma jamoasi futbolchilarining quvonchi uzoqqa cho‘zilmasligi mumkin. Bir necha nufuzli manbalarning ta’kidlashicha, FIFA mutasaddilari bu jamoani mundialdan chetlatish masalasini ko‘rib chiqishiga to‘g‘ri keladi.

Bunga “Monpele”dan taklif etilgan Yannis Issufu sabab qilib ko‘rsatilmoqda. Ma’lum bo‘lishicha, bu o‘yinchi mazkur jahon chempionatining saralash turnirida Niger terma jamoasi safida ham to‘p tepgan.

Sport News Africa nashrining yozishicha, Frantsiya futbol federatsiyasi Issufuning Afrikadagi saralash o‘yinlarida qatnashganidan bexabar bo‘lgan. Futbolchining o‘zi ham boshqa mamlakat yoshlar terma jamoasida o‘ynaganini aytmagan.

FIFA qoidalariga ko‘ra, futbolchilar bir musobaqa doirasida boshqa-boshqa jamoalar o‘yinchisi sifatida qatnashishi qat’iyan man qilinadi. Shu bois, ayrim mutaxassislar Frantsiya terma jamoasi musobaqadan chetlatilishi lozimligini ta’kidlamoqda.

Agar Frantsiya terma jamoasi bilan bir kvartetdan joy olgan va guruhda qolib ketgan Burkina Faso musobaqa tashkilotchilariga apellyatsiya beradigan bo‘lsa, masala yanada jiddiylashadi.

Indoneziyadagi jahon chempionatida Issifu guruh bosqichining uchala uchrashuvida ham maydonga tushdi. Jumladan, asli nigerlik bo‘lib chiqqan futbolchi birinchi turda Burkino-Fasoga ham qarshi to‘p tepgan.

Aniqlanishicha, Issufu Niger yoshlar terma jamoasi safida 2022 yili Ganada o‘tkazilgan saralashda Kot-d’Ivuar va Beninga qarshi ikkita bellashuvda qatnashgan. Iste’dodli futbolchi ivuarliklar darvozasini ishg‘ol qilgan bo‘lsa, Beninga qarshi bahsda uchrashuvning eng yaxshi futbolchisi, deb topilgan.

Eslatib o‘tamiz, jahon chempionatida Osiyo qit’asidan beshta terma jamoa qatnashdi. O‘zbekiston ishtirokini davom ettirayotgan qit’amizning yagona vakili hisoblanadi.

Hamyurtlarimiz guruh bahslarida Malidan 0:3 hisobida mag‘lubiyatga uchragan bo‘lsa, Kanada darvozasiga javobsiz uchta to‘p kiritdi. Hal qiluvchi uchinchi uchrashuvda Ispaniya bilan 2:2 hisobida durang o‘ynagan yoshlarimiz, nimchorak finalga chiqqan edi.

Frantsiya va O‘zbekiston o‘rtasidagi chorak final uchrashuvi 25 noyabrga belgilangan.

O‘zbeklar jahon chempionatida shov-shuv ko‘tardi!

“Chelsi”da porlagan futbolchi Fayzullaevga baho berdi

Agent: TsSKA bu narxga Fayzullaevni bermaydi!

Fayzullaev Evropada o‘ynashga tayyormi?

“Kalyari”dan Shomurodovga yaxshi xabar

Shomurodov qaysi terma jamoalarga nechta gol urgan?

Fayzullaev braziliyaliklarni hayratga soldi

Fayzullaev Evropadan yaxshi taklifni rad etmaydi!

Shomurodov eng oxirida, Husanov esa yo‘q!