"Bu holat har bir murabbiyni boshida bor, vazifamiz o‘z kuchida, hech nima o‘zgarmaydi" - Bahrom Haydarov

Pro ligada birinchi davrani o‘z imkoniyati darajadasida o‘tkaza olmagan “Qo‘qon-1912” klubida yaqinda bosh murabbiy o‘zgarganidan xabaringiz bo‘lsa kerak.

Bungacha murabbiylar shtabida ishlagan Bahrom Haydarov endi bosh murabbiy lavozimiga tayinlandi. Hozirda jamoa ushbu mutaxassis boshchiligida ikkinchi davraga tayyorgarlikka kirishdi.

Fursatdan foydalanib, Sports.uz jurnalisti Haydarov bilan suhbatlashdi.

- “Qo‘qon-1912” klubiga bosh murabbiy etib tayinlanganingiz bilan tabriklayman. Bu taklifni qanday qabul qildingiz?

- To‘g‘risi, mendan oldingi bosh murabbiy Muhsin Nizomiddinovning taklifi bilan jamoaga kelgandim. Birinchi davrada jamoani tayyorlashda va yig‘inlarda men ham ishtirok etganman. Nizomiddinov iste’foga chiqarilganida men ham klubdan ketishni xohladim. Bosh murabbiy bo‘lganimdan unchalik xursand emasman. Bunday vzaiyatda Muhsinni o‘zi qolib, jamoa bilan birinchi o‘rinda ketganimiz yaxshi edi. Niyatimiz ham shu edi. Mayli, taqdir ekan, shunday bo‘ldi. Bunday holat har bir murabbiyni boshida bor. Shuncha ishdan keyin biz ham ketishga tayyor edik. Lekin rahbariyatga rahmat, ishonch bildirishib, bosh murabbiylik lavozimini taklif qilishdi. Yo‘q deya olmadik. Rahbariyat tarafidan ishonch bo‘lsa, moliyaviy tomonidan qat’iy nazar har qanday jamoada ishlagingiz keladi.

- “Qo‘qon-1912”ni Superligaga maqsadi bor. Biroq birinchi davrada ko‘p ochko yo‘qotdi va 5-o‘ringa tushib ketdi. Buning asosiy sababini nima bilan izohlagan bo‘lardingiz?

- Aybni unga-bunga to‘nkashni keragi yo‘q. Balki biz murabbiylar shtabi yaxshi tayyorlay olmagandirmiz. Birinchi 7 ta o‘yindan keyin 1-o‘rinda edik. Keyingi 7 talikda esa asosiy raqiblarimizdan “Mash’al”ni yutdik, “Buxoro” bilan durang o‘ynadik. Ammo kamroq maqsadi bor klublarga qarshi uchrashuvlarda umuman ochko ololmadik, desak ham bo‘ladi. Ko‘pchilik buni omadsizlikka, gol urolmaslikka to‘nkayapti. Hozir bir oy vaqtimiz bor. Barchasini batafsil tahlil qilib chiqyapmiz. Xatolarimizni o‘rganib chiqib, bartaraf qilamiz. Jamoamiz yaxshi, o‘ziga yarasha kuchli. Jamoaga ishonaman. Xatolarimiz mayda xatolar. Biroq futbolda mayda-chuyda narsalar bo‘lmaydi.

- Oldingizdagi asosiy vazifa hamon klubni Superligaga qaytarishmi? Qiyin vaziyatdan chiqib ketish uchun murabbiy sifatida qanday echim topmoqchisiz?

- Bir-ikkita o‘yinchilarni chaqiryapmiz, muzokaralar o‘tkazyapmiz. Tarkibimizni yana kuchaytiramiz. Himoyamiz ko‘p gol o‘tkazib yuborgan, hujumda etarlicha samaradorlik mavjud emas. Bu ko‘p klublarning “kasalligi”. Pro liga uchun yordam beradigan, raqobat yaratadigan emas, asosiy tarkibda o‘ynab jamoani tortib ketadigan futbolchilarni qidiryapmiz. Albatta, bu ish qiyin bo‘lyapti. Mavsum o‘rtasida ko‘pchiligini klublari bilan shartnomalari bor. Ammo o‘zimizga kerakli futbolchilarni qidirishda davom etyapmiz. Maqsad kamida 1-o‘rindagi klubga etib olish. Vazifamiz o‘z kuchida, sira ham hech nima o‘zgarmaydi. Oxirgi uchta uchrashuvda boshqacha reja qilgandik. Har doim siz o‘ylagan reja amalga oshavermaydi. O‘ylaymanki, etakchilarga etib olamiz va ulardan o‘tib ketishga ham harakat qilamiz.

- Ikkinchi davra uchun tayyorgarlik rejasi qanday?

- Chorvoqda yig‘ildik. Bu tog‘li hudud. Bu erda asosan jismoniy tayyorgarlik bo‘yicha ishlayapmiz. Keyin Toshkentda to‘plar bilan ishlab, taktika borasida mehnat qilamiz. 20 iyul kuni “Paxtakor” bilan o‘rtoqlik uchrashuvimiz bor. Xitoyda bizga o‘rtoqlik uchrashuvi taklif qilishgan. Agar o‘xshasa u erga borib kelamiz.

- Xitoyda qanday o‘yin bo‘ladi?

- 25 iyul kuniga Xitoy klubidan taklif kelgan. Hujjat ishlarini bitirishga ulgurishsa, u erga borib o‘ynab kelish rejamiz yo‘q emas.

- Yaqinda uch nafar o‘yinchi ketgani e’lon qilindi. Jamoaga yangi o‘yinchilardan kimlar kelyapti va yana qaysi futbolchilarning xizmatidan voz kechyapsizlar?

- Hozircha hamma o‘qigan o‘sha uch nafar o‘yinchi bilan xayrlashdik. Shunday vaziyat bo‘lyaptiki, ular etarlicha o‘yin amaliyotiga ega bo‘la olmayaptilar. Asosiy tarkib o‘yinchilariga aylana olmadilar. Ikkinchi davrada ularni yana ushlab o‘tirib, faqat mashg‘ulotlarda qatnashib yurishlari o‘zlariga ham, jamoaga ham zarar bo‘ladi. Shu bois xayrlashdik. Qolgan 22 nafar futbolchi jamoa bilan. Ammo yig‘ilish o‘tkazdik, ularga ham klubda qolding degan gap-so‘z yo‘q. Masalan, 5 ta o‘yinchi olishimiz kerak. Ammo bu klubdan 5 nafar futbolchi ketishini anglatmaydi, kerak bo‘lsa 7-8 tasidan ham voz kechamiz, agar jamoamizga foyda keltirishmasa. Kimlar bilan muzokara olib borayotganimizni aytmay turaman. Hali to‘liq yakuniga etgani yo‘q.

- Yangi legioner keladimi?

- O‘tgan yili “Mash’al”da to‘p surgan Shota Gvazava bilan kelishdik. 14 iyul kuni etib keladi. Hozircha og‘zaki kelishdik. U chempionatning oxirgi bir haftasida jamoamiz bilan birga shug‘ullanib ham ketdi. Klub bilan yaqindan tanishdi. Biz ham u haqida ma’lumotlarga ega bo‘ldik. O‘yinimizga mos tushsa shartnoma imzolaymiz.

Shuhratbek Jo‘raev.