"Paxtakor" murabbiyi alamli mag‘lubiyatdan so‘ng nimalar dedi?

Osiyo chempionlar ligasi guruh bosqichi 1-turidan o‘rin olgan bahsda "Paxtakor" "Sepaxon"ga 1:3 hisobida mag‘lub bo‘ldi. Uchrashuvdan so‘ng "sherlar" bosh murabbiyi Slavche Voynevski quyidagi fikrlarni bildirib o‘tdi. 

- O‘yinni ikkiga bo‘lgan bo‘lardim. Birinchi bo‘limda o‘yinni nazorat qildik, gol urdik, yaxshi harakatlandik. Biroq ikkinchi bo‘limda standart holatlardan keyin ikki marta qo‘pol xato qildik va hisobda ortda qola boshladik. Keyin oldinga tashlanib, uchinchi golni o‘tkazdik.

Ruhiy va jismoniy tayyorgarlik yonma-yon yuradi. Xatolarni e’tiborni yo‘qotganimiz bilan izohlagan bo‘lardim. Bu bizga qimmatga tushdi. Yigitlar oxirigacha kurashishdi, buning uchun ularga rahmat.

"Al Ta’avun" bilan oson bo‘lmaydi. Guruhda barcha bellashuv og‘ir kechadi, buni o‘yindan oldin ham aytib o‘tgandim. Yaxshi saviyali jamoalar jamlangan guruhdan joy olganmiz.