"Pekin-2022" qishki Olimpiadaning mash’alasi taqdim qilindi

Mash’ala Xitoyning “Sinopes” kompaniyasi tomonidan ishlab chiqarilgan uglerod tolasidan tayyorlangan, vazni engil va yuqori haroratga chidamli. Olimpiada ramzining ushbu ko‘rinishi spiral shaklida pastdan yuqoriga ko‘tarilgan ikkita tasmaga o‘xshaydi. Ulardan biri qizil, ikkinchisi kumush rangda. Manbalarning ta’kidlashicha, «kumush va qizil ranglar muz va olov uchrashuvini anglatadi». Mash’alada "Pekin-2022" ramzi va Olimpiya halqalari, bulut va qor parchalari naqshlari tasvirlangan.

Paralimpiya qishki o‘yinlari uchun xuddi shunday mash’ala dizayni ishlab chiqilgan, ammo u qizil va oltin ranglarda. 25 yanvar kuni XXR raisi Si Tszinpin XOQ rahbari Tomas Bax bilan telefon orqali suhbat chog‘ida pandemiya keltirib chiqargan qiyinchiliklarga qaramay, Xitoy hukumati 2022 yilgi o‘yinlarni o‘tkazmoqchi ekanini ma’lum qilgan.

XXIV qishki Olimpiya o‘yinlari Pekin shahrida 2022 yilning 4-20 fevral kunlari bo‘lib o‘tadi. Xitoy poytaxti Olimpiadani o‘tkazish uchun 2015 yil 31 iyulda Kuala-Lumpurda bo‘lib o‘tgan XOQ sessiyasida tanlangan.