Шомуродовни кутяпмиз!

А Сериянинг 32-тури “Рома” футболчиларига анча қулай рақиб – мусобақа жадвалининг сўнгги поғонасида бораётган “Салернитана” клубини рўбарў қилди. Бу борада, римликларнинг омади келди. Чунки жамоа 7 апрелда совуқ Норвегияда оғир учрашув ўтказиб келганди. Агар чемпионат ўйинида кучлироқ рақиб дуч келганида Жозе Моуриньо шогирдлари уч кун фарқ билан жиддий курашга киришиши анча қийин бўларди.

“Будё-Глимт” римликларни яна мағлуб этди. Энди “Рома” футболчилари “Салернитана”га қарши учрашувда ўзини оқлаб олиши керак бўлади. Беллашув “Олимпико”да ўтказилиши Жозе Моуриньо шогирдларига қўшимча масъулият юклайди. Ҳар ҳолда жамоа ўз майдонида аутсайдерни енга олмаса, Норвегиядаги иккинчи мағлубиятдан аламзада бўлиб юрган Римнинг талабчан ашаддий тиффозилари ўйинчиларни умуман кечирмаса керак.

picture_1

Конференциялар лигаси чорак финалининг биринчи учрашувидаги муваффақиятсизликка қарамай, “Рома” А Серияда ўнта ўйиндан бери мағлуб бўлгани йўқ. Пойтахтлик “бўрилар” олтита ғалаба ва тўртта дуранг қайд этди. Айниқса, Еврокубоклар йўлланмаси учун курашдаги асосий рақобатчилари – “Лацио” ва “Аталанта”ни мағлуб эта олгани, уларнинг мусобақа жадвалида бешинчи ўринга кўтарилиб олиши таъминлади.

Ҳозир Моуриньо шогирдларида назарий жиҳатдан Европа Чемпионлар лигаси йўлланмасини берадиган тўртинчи ўринга чиқиб олиш имкони бор. Бу кўп жиҳатдан “Ювентус”нинг натижаларига боғлиқ бўлади.

А Серия дебютанти “Салернитана”нинг юқори лигада ўз мавқеини сақлаб қолишга умуман кучи етмаяпти. Давиде Никола шогирдлари жорий мавсумда фақатгина аутсайдерлар – “Женоа”, “Венеция” ва кутилмаганда ўртамиёна жамоалардан “Венеция”ни мағлуб эта олди холос. Яна еттита ўйинда дуранг қайд этиб, жами 16 очко билан 20-ўринда қайд этилган.

А Сериядаги сўнгги ўнта учрашувдан атиги бештаси бир очкодан қўлга киритган “Салернитана” катта эҳтимол билан қуйи лигага қайтиб кетади.

“Рома” ва “Салернитана” шу пайтга қадар  умумий ҳисобда етти марта ўзаро тўқнаш келган. Биринчи даврада рақиб майдонидаги учрашувда римликлар мезбонлар дарвозасига тўртта тўп критган. Ўша учрашувда ғалаба нақд бўлганидан кейин Элдор Шомуродов захирадан ўйинга қўшилиб, атиги 12 дақиқа ҳаракат қилди холос.

Дарҳақиқат, “Салернитана” А  Серияда энг кўп – 66 та тўп ўтказиб юборган жамоа ҳисобланади.

Икки клубнинг аввалги учрашувлари ўтган асрга тўғри келади. Дастлаб,  улар 1945-1949 йилларда тўрт марта рўбарў келган ва бу ўйинларда Рим клуби вакилларининг қўли баланд келган. Кейинчалик 1998 йилда “Салернитана” А Серияга қайтиб, Римдаги баҳсда ютқазди. Келаси йили ўз уйида “Рома” устидан биринчи ва охириги ғалабасини тантана қилди.

Барча фактларни инобатга олиб, мутахассисларнинг аксарияти навбатдаги учрашувда “бўрилар”нинг ғалабасига ишонч билдирмоқда. Бир сўз билан айтганда, ўйини анча кучайиб қолган Моуриньо шогирдларини уч очколи баҳс кутяпти.

Хориж матбуоти бўлажак ўйин олдидан таркибларни тахмин қилар экан, “Рома” футболчиларидан Жордан Верету, Николо Дзаньоло, Лоренцо Пеллегрини, Леонардо Спинацолла, Жанлука Манчини  ўйнамаслигини ёзмоқда. Шунингдек, Норвегияда тўлиқ ўйнаган Тэмми Абрахам оёғида оғриқ сезгани учун қўшимча тиббий кўрикдан ўтказилди.  

“Салернитана” вакилларидан Георгиос Кастанос, Федерико Фасио аниқ ўйнамайди. Леонарду Капецци, Федерик Весели, Мамаду Кулибали, Диего Перотти, Андреа Скьявоне, Викторио Фьориоьонинг беллашувда иштирок этиши сўроқ остида турибди.

Шу ўринда, ўзбекистонлик мухлислар Элдор Шомуродовнинг майдонга туширилишини кутмоқда. Норвегиядаги учрашувда Жозе Моуриньо ҳужумчимизга аввалги беллашувларга қараганда кўпроқ ўйин вақти тақдим қилиб, Элдорни 65-дақиқада майдонга ташлади.

12aa5b8d188a74d4ad4907f81626a194_2

Одатда, кучли рақибга қарши учрашувда мураббийлар уч кун олдин оғир ўйинда толиққан бошланғич таркиб ўйинчиларига дам бериб, захира имкониятларини синовдан ўтказиб олади. Биз ҳам шундай бўлиб, Шомуродовнинг кўпроқ ўйнашини кутяпмиз. Элдорнинг ўзи ҳам кўпроқ ўйин амалиётига эга бўлишни истаётганини яшираётгани йўқ.

Бироқ, “Рома”ни Жозе Моуриньо сингари ўз билганидан қолмайдиган мураббий бошқараётган экан, португалиялик мутахассиснинг қарорларини олдиндан тахмин қилиб бўлмайди.

Шомуродов прессингни боплади, лекин...

Моуриньонинг нега жаҳли чиқди ёхуд у бугун Шомуродовни ўйнатадими?

Ўзбек легионери майдонга қайтиб, ҳаммасини жой-жойига қўйиши керак!

Ўзбек футболчисини Европада эътироф этишди

“Рома”: Бу футболчи энди ўйнамайди! Моуриньо ким ҳақида гапирди?

“Рома” ҳужумчиси бўйича кутилмаган вазият юзага келди!

 

Фикрлар

Фикр қолдириш учун авторизациядан ўтинг!