Анчелотти Шомуродов жамоасини бошқаришни орзу қилмоқда

“Реал” бош мураббийи Карло Анчелотти мавсум якунланиши билан Мадридни тарк этиши мумкин. Тажрибали мутахассис хизматига муҳтожлар кам эмас. Хусусан, Бразилия футбол федерацияси ҳам италиялик мураббийга мамлакат бош жамоасини топширишга тайёр.

Бироқ, “Милан”да Карло Анчелотти билан бирга ишлаган мураббий Жоржо Часкинининг маълум қилишича, дунёнинг энг зўр мураббийларидан ҳисобланган бу мутахассис Италияда бир клубни бошқаришни азалдан орзу қилади.

Бу айни пайтда Жозе Моуриньо ишлаётган “Рома” клуби экан.

- Анчелоттининг орзуси “Рома” бош мураббийи бўлиш. Ўзаро суҳбатларимиз давомида у жуда кўп бора мана шу истаги ҳақида гапирган. Карлонинг қалбида “Рома”га бўлган муҳаббат азалдан барқ уриб туради. Унинг “Рома”ни бошқараётганини тасаввур қилиш қийин эмас, - деди Жоржо Часкини.

Маълумки, кучли бешлик чемпионатларидаги ягона вакилимиз Элдор Шомуродов айнан Рим клуби аъзоси ҳисобланади. Легионеримиз мавсум тугаши билан “Специя”дан “Рома”га қайтиб бориши белгиланган.

Ёзда кўп нарса ўзгариши мумкин. Жозе Моуриньо ўзининг юлдузли онлари ўтган “Челси”га қайтишни орзу қиляпти. “Реал” мавсум якунланиши билан Карло Анчелотти ўрнига бошқа мутахассис олиб келиш бўйича иш бошлаган. Моуриньо ўйнатмаган Шомуродов эса, ёзда пойтахтга қайтиб, яна асосий таркибга кириш учун курашади.

Мутахассисларнинг таъкидлашича, Карло Анчелоттининг Рим клубини бошқаришга иштиёқи баланд эканини бежиз эмас. У футболчилик фаолиятида 1979-1987 йиллар давомида “Рома” шарафини ҳимоя қилган. Шунингдек, “Парма” ва “Милан”да ҳам тўп тепган. Лекин энг узоқ муддат “бўрилар” сафида бўлган. 1982-1983 йилги мавсумда бу жамоанинг Скудеттони қўлга киритишига кўн меҳнати сингган.

Яна бир омил шундан иборатки, Анчелотти ўзи ўйнаган икки жамоа – “Парма” ва “Милан”ни бош мураббий сифатида бошқарган. Лекин “Рома”да ишлаш ёши 63га бориб қолган бу мутахассис учун армон бўлиб қолмоқда.

Аслида Анчелотти “Рома” билан улкан натижаларни қўлга киритяпти. 2021 йил мадридликларни қабул қилиб олган мутахассис шогирдлари Испания чемпионати, Европа Чемпионлар лигаси ва клублар ўртасидаги жаҳон чемпионати ғолибига айлантирди. Шунга қарамай, “Қироллик клуби” раҳбарияти унинг ўрнига бошқа устоз олиб келишга қарор қилган.

Анчелотти мураббий сифатида кучли бешлик чемпионатларининг барчасида муваффақиятли ишлаган кам сонли мутахассислардан. У ўз юртида “Реджина”, “Парма”, “Ювентус”, “Милан”, “Наполи”ни бошқарган, Англияда “Челси” ва “Эвертон”да, Францияда “Пари Сен-Жермен”да, Германияда “Бавария”да ишлаган. Ҳозир Испания гранди “Реал”ни иккинчи маротаба чўққига кўтаряпти.    

Ўзи ишлаган барча лигаларда мамлакат чемпионлигига ва турли даражадаги кубокларга кўп маротаба сазовор бўлган. Европа Чемпионлар лигаси,  УЕФА Суперкубоги, клублар ўртасидаги жаҳон чемпионати каби нуфузли халқаро турнирларда бир неча маротабадан зафар қучган.  

Демак, мураббийлик фаолиятини муваффақиятли давом эттираётган Карло Анчелоттининг биргина армони қолди. У орзусига эришиб, “Рома”да ишлайдими ёки йўқ, буни вақт кўрсатади.

Ғалаба бой берилган ўйинда Шомуродовнинг ўйини қандай баҳоланди?

Шомуродов лиганинг энг зўр дарвозабонига қарши!

Шомуродов билан бирга зўр тўпурар ўйнайди!