Файзуллаев бирорта ўзбек футболчиси эришмаган натижани қайд этди

Ўзбекистон миллий терма жамоаси ва Москванинг ЦСКА клуби ҳужумкор футболчиси Аббосбек Файзуллаев қўлга киритган совринлари сонини кўпайтиришда давом этмоқда.

21 ёшли легионеримиз “армиячилар” таркибида Россия Премьер-лигасининг бронза медалига эга чиққан ва мамлакат кубогига сазовор бўлган эди.

Янги чемпионат олдидан Россия футболида яна бир нуфузли соврин учун расмий учрашув ўтказилди. Унда Премьер-лига тарихида илк чемпионлик унвонига эга чиққан “Краснодар” мамлакат кубоги соҳиби ЦСКА билан Суперкубок учун беллашди.

Нейтрал майдон – Қозон шаҳридаги стадионда ўтган учрашув кескин ва муросасиз курашларга бой бўлди. Ўйиннинг 49-дақиқасида “армиячилар” ҳимоячиси Игорь Дивеев киритган гол пойтахтликларнинг ғалабасини таъминлади.

Аббосбек Файзуллаев 79-дақиқада ҳужумчи Тамерлан Мусаевнинг ўрнига захирадан ўйинга қўшилиб, жамоасининг ғалабасини ушлаб қолишга ўз ҳиссасини қўшди.

ЦСКА ўз тарихида саккизинчи маротаба Россия Суперкубогига эга бўлди. “Краснодар” эса, биринчи бор Суперкубокни қўлга киритиш имконини бой берди.

Биз учун аҳамиятлиси, Аббосбек Файзуллаев клублар миқёсида бир йил ичида икки соврин – Россия кубоги ва Суперкубоги билан якунлади.

Шу тариқа, Аббосбек Файзуллаев ҳам кубок, ҳам Суперкубок эгасига айланган биринчи ва ҳозирча ягона ўзбек футболчиси сифатида номини тарихга ёзди.

Айни пайтда Аббосбек Файзуллаев Европага йўл олиши кутилаётгани ҳақида маълумотлар тарқатилмоқда. Туркиялик журналист Усмон Алтунтерим 21 ёшли ўзбек футболчиси Туркия Суперлигасида иштирок этаётган “Истанбул Башакшеҳир” жамоасига ўтишга розилик билдирганини маълум қилди.

- Файзуллаев “Башакшеҳир”га ўтишга яқин. Футболчи Истанбулга кўчиб ўтишни истаяпти. Бу орада турк клуб ва ЦСКА ўртасида трансфер суммасига оид қарашларда катта фарқ йўқ.

Аввалроқ, “Башакшеҳир”га Аббоснинг Ўзбекистон миллий терма жамоасидаги шериги Элдор Шомуродов ҳам қўшилган эди, - деб ёзди Усмон Алтунтерим.

Эслатиб ўтамиз, Туркия чемпионатида юқори ўринлар ва Европа кубоклар йўлланмаси учун курашишни мақсад қилган “Истанбул Башакшеҳир” клуби ёзги трансферлар даврила таркибини кучайтиришга ҳаракат қилмоқда.

Бу жамоа “Рома” ҳужумчиси Элдор Шомуродовни кейинчалик тўлиқ трансфер қилиш мажбурияти билан бир мавсумга ижарага олди.

Ўзбек легионери трансфердан норози фанатларга зўрлигини исботлаши керак!

Премьер-лига мураббийи футболни ўзбеклардан ўрганмоқчи!

Машҳур футболчи Ҳусановга ёрдам берадиган бўлди

Ҳусанов кўз ўнгида “Манчестер Сити” тарихий рекорд ўрнатди

Файзуллаев бразилияликларнинг “жаҳли”ни чиқарди!

Гвардиолага айнан Ҳусанов етишмади!