Файзуллаевга яна бир хушхабар
Аббосбек Файзуллаев бир йил ичида бунақа кўп эътироф ва эътиборга, индивидуал совринларга сазовор бўлишини ўзи ҳам кутмаган бўлса керак.
Ҳаммаси 2023 йили Тошкентда ўтказилган 20 ёшгача бўлган футболчилар ўртасидаги Осиё чемпионатидан бошланди. Терма жамоа етакчиларидан ҳисобланган Аббосбек Файзуллаев ҳамюртларимизнинг ушбу турнирдаги ғалабасига катта ҳисса қўшди.
Истеъдодли ўйинчи Осиё чемпиони, деган шарафли ном билан бирга қитъа чемпионатининг энг яхши ўйинчиси номига ҳам сазовор бўлди.
Уўшбу тарихий ғалабадан сўнг, бир неча ойдан кейин Аббосбек Ўзбекистон ёшлар терма жамоаси сафида Аргентинада ўтказилган жаҳон чемпионатида ҳам юқори савияда ўйнади.
Файзуллаевнинг халқаро майдондаги муваффақиятлари унга хориж чемпионатига йўл очди. Аббосбек таклиф орасида ЦСКА вариантини танлади.
Янги йил арафасида Москвадан Аббосбек Файзуллаевга яна бир хушхабар келди. Айни пайтда Ўзбекистон миллий терма жамоаси сафида 12 январдан 10 февралга қадар Қатарда бўладиган Осиё кубогига тайёргарлик кўраётган легионеримиз мухлислар ва экспертлар томонидан ЦСКАнинг мавсум биринчи қисмидаги энг яхши футболчиси, деб эътироф этилди.
Натижалар билан қуйидаги суратлар орқали танишиш мумкин:
Аслини олганда, Аббосбек Файзуллаев бу сўровномада катта устунлик билан ғолиб чиқиши бежиз эмас, албатта. Бунгача 20 ёшли ҳужумкор футболчимиз сентябрь, октябрь, ноябрь ва декабрь ойларида ҳам жамоасининг энг яхши ўйинчиси, деб топилган эди.
Аббосбек “Пахтакор”дан Москванинг ЦСКА клубига август ойи бошида кўчиб ўтган эди. Сентябрдан бошлаб, Владимир Федотов бошчилигидаги мураббийлар штаби ишончини оқлади ва шундан бери бошланғич таркибнинг муқим аъзосига айланди.
Файзуллаев қисқа фурсат ичида ЦСКА ҳужум чизиғининг етакчиси бўлди. Ҳозир жамоанинг аксарият ҳужумчилари айнан ўзбек ўйинчиси орқали ташкил этилмоқда.
Ҳамюртимиз Россия Премьер-лигаси ва мамлакат кубогида жами 18 та учрашувда майдонга тушиб, рақиблар дарвозасини икки маротаба ишғол қилди, жамоадошларига тўққизта голли пас узатди.
Бундан ташқари, Аббосбек Файзуллаев чемпионатнинг бир нечта учрашувларида энг яхши футболчи совринига лойиқ топилди.
Ўзбек футболининг истеъдодли тарбияланувчиси клуб миқёсида ва мамлакат терма жамоалари сафида халқаро майдонда эришган муваффақиятли эвазига яқиндагина Ўзбекистоннинг 2023 йилдаги энг яхши футболчиси, деб эълон қилинди.
Аббосбек Файзуллаевга келажакдаги фаолиятида ҳам улкан зафарлар, қувончли онлар, буюк ғалабалар кўп бўлишини тилаб қоламиз.
Фикрлар