Файзуллаев энг муҳим воқеани айтди
ЦСКА матбуот ихизмати клуб футболчиларидан йил якунлари муносабати билан блиц интервьюлар олиб, мухлислар эътиборига ҳавола қилди.
Кўпчиликнинг диққат-эътиборини жамоа етакчисига айланган Аббосбек Файзуллаев билан бўлган савол-жавоб ўзига тортди.
- Янги йил дастурхонага қўйилиши шарт бўлган энг севимли байрам таоми қайси?
- Ўзбекча норин.
- Янги кечасидаги энг яхши анъана?
- Бутун оила билан бир дастурхон атрофида жамланиб, бир-бирига яхши тилаклар ва ниятлар билдириш.
- Янги йилга бағишланган энг севимли фильм қайси?
- “Уйда ёлғиз”.
- 2023 йилдаги энг эсда қоларли воқеа?
- 20 ёшгача футболчилар ўртасида Осиё чемпиони бўлиш ва мамлакат Президенти қўлидан кубокни қабул қилиб олиш.
Таъкидлаш жоизки, Аббосбек Файзуллаев энг муҳим воқеа сифатида эътироф этган 20 ёшгача бўлган футболчилар иштирокидаги Осиё чемпионати унинг фаолиятида катта бурилиш ясади.
Файзуллаев ёшлар терма жамоаси етакчиси сифатида ҳамюртларимизнинг қитъа миқёсидаги мусобақада ғолиб чиқишига катта ҳисса қўшди. Турнир ташкилотчиси – Осиё футбол конфедерацияси Аббосбекнинг хизматларини тан олиб, уни мусобақанинг энг яхши футболчиси соврини билан тақдирлади.
Истеъдодли ҳужумкор футболчимиз айнан мана шу мусобақада хориж клублари мутахассислари эътиборига тушди.
Ўзбекистон ёшлар терма жамоаси қитъа чемпиони сифатида Аргентинада ўтказилган 20 ёшгача футболчилар ўртасидаги жаҳон чемпионатида ҳам жуда яхши ўйин намойиш қилди. Бу мусобақадан кейин Европа клублари ўзбек футболчиларига эътибор қаратди.
Осиё ва жаҳон чемпионатида ўйнаган йигитларимиз орасида Аббосбек Файзуллаевдан ташқари Абдуқодир Ҳусанов кучли лигага йўл олиб, Франция вице-чемпиони “Ланс” билан тўрт йиллик шартномага имзо чекди.
Аббосбек Файзуллаев эса, ЦСКА таклифини қабул қилди. Ҳозир унинг танлови тўғри бўлгани ўз тасдиғини топган.
20 ёшли Аббос экспертлар томонидан Россия Премьер-лигаси кашфиёти, лиганинг энг кучли ўйинчиси, ЦСКАнинг энг яхши футболчиси каби эътирофларга сазовор бўлмоқда.
Қолаверса, Файзуллаевнинг трансфер суммаси кескин ошиб, тўрт миллион еврога етди. Айни пайтда Аббосбек Ўзбекистон миллий терма жамоаси сафида яна бир нуфузли мусобақа – Осиё кубогида қатнашишга жиддий тайёргарлик кўряпти.
Фикрлар