Гвардиола Ҳусановни ўйнатганидан афсусдами?
Европа Чемпионлар лигасининг 1/8 финал босқичи биринчи учрашувида “Манчестер Сити” футболчилари Мадридда “Реал”га 0:3 ҳисобида ютқазиб қўйди. Экспертлар ва мухлислари бу баҳсдан кейин Хосеп Гвардиолани таркиб танлашда адашганини иддао қилмоқда.
Танқид билдираётганлар испаниялик мутахассис Винисиус Жуниорни тўхтатиш учун ҳимоянинг ўнг қанотида Абдуқодир Ҳусановни ўйнатгани хато қарор эканини таъкидламоқда.
Бироқ, Пеп Гвардиола “Сантьяго Бернабеу”да айнан шу таркибни майдонга туширганидан афсусда эмаслигини билдирди.
Ёмон натижага қарамай, Гвардиола бу вазиятда ўзини оқлашга ҳаракат қилмаяпти, бироқ унинг фикрича, жамоа шу куни яхши ўйнаган.
- Биз Мадридда ютдикми ёки ютқаздикми? Ютқаздик, демак таркиб танлови ёмон бўлган.
Биз “Ньюкасл” майдонида ютдикми ёки ютқаздикми? Ютдик, демак таркиб танлови яхши бўлган.
Ўйлайманки, Лига кубоги ва Англия кубогида ҳар сафар жамоа учун энг яхши қарорларни қабул қиламиз.
Албатта, биз ҳар уч кунда бир хил таркиб билан ўйнай олмаймиз. Бунинг иложи йўқ.
Биз қўлга киритган совринлар сони ҳар бир ўйинда аҳамиятга эга эмас.
Мадриддаги ўйин ҳақида менинг ўз фикрим ва қарашларим бор. Биринчи бўлимда, айниқса дастлабки 20 дақиқада биз жуда яхши ўйнадик.
Мен айтардимки, биз у ерда ҳеч қачон бунчалик яхши ўйнамаганмиз.
Биз хавфли вазиятлар яратдик, аммо шундан кейин ҳиссиётлар пайдо бўлди ва биз дарҳол гол ўтказиб юбордик.
Тўғри, айрим хатолар қилдик, ҳиссиётларга берилиб кетдик ва ўйин бутунлай бошқача тус олди. Бироқ иккинчи бўлимни ҳам жуда яхши бошладик. Лекин кечирасиз-у, бизнинг дарвозамизга пенальти белгиланди.
Бизда аниқ голли имкониятлар бор эди. Биз ўйин ичида эдик.
Бу тақдир менга биринчи марта қаттиқ муносабатда бўлаётгани йўқ. Мен ЧемпионларЛигаси плей-офф босқичларида кўп марта ютқазганман. Менинг қарорларим учун мени кўп марта танқид қилишган.
Мен таркиб танлови ҳақида одамларга қарши фикр билдиришим мумкин эди, лекин буни қилмайман, чунки биз ютқаздик.
Далиллар фақат ўйиндан олдин бўлиши мумкин, - деди Гвардиола SkySports журналистларига берган интервьюсида.
Эслатиб ўтамиз, “Реал” ва “Манчестер Сити” жавоб учрашувини 17 март куни ўтказади. Бу баҳсга Хосеп Гвардиола шогирдлари мезбонлик қилади. Испаниялик мутахассис жамоа вазиятни ўнглай олишига ишоняпти.
Фикрлар