Ҳусанов 16 май куни яна бир нуфузли совринни ютиши мумкин
2025-2026 йилги мавсумдаги Англия кубоги финалида “Манчестер Сити” ва “Челси” ўзаро куч синашадиган бўлди.
Бу ўйин 16 май куни «Уэмбли» стадионида бўлиб ўтади.
Турнирнинг аввалги босқичларида “шаҳарликлар” ажойиб натижа қайд этиб, “Эксетер Сити”ни 10:1, “Солфорд Сити”ни 2:0, “Ньюкасл Юнайтед”ни 3:1, “Ливерпуль”ни 4:0 ва “Саутгемптон”ни 2:1 ҳисобида мағлубиятга учратди.
“Челси” футболчилари эса, финалгача бўлган йўлда нисбатан қулай рақиблар – “Чарльтон Атлетик”дан 5:1, “Халл Сити”дан 4:0, “Рексем”дан 4:2, “Порт Вейл”дан 7:0 ва “Лидс Юнайтед”дан 1:0 ҳисобида устун келди.
Англия кубогини энг кўп қўлга киритган жамоа “Арсенал” ҳисобланади. “Канонирлар” юу турнирда жами 14 маротаба ғолиб чиққан эди.
Бу кўрсаткич бўйича иккинчи ўринда “Манчестер Юнайтед” 13 та соврин билан қайд этилган. Қаторасига учта жамоа “Ливерпуль”, “Тоттенхэм Хотспур” ва “Челси” саккиз маротабадан кубокни қўлга киритган. Агар “Челси” навбатдаги финалда ғолиб чиқса, бу рейтингда учинчи ўринни ўзиники қилади.
16 май куни ғолиблик “Манчестер Сити”га насиб қилса, “шаҳарликлар” Англия кубогидаги ютуқлари сонини 8 тага етказиб, бир поғона юқорида турган жамоалар сафига қўшилади.
Эслатиб ўтамиз, Ўзбекистон миллий терма жамоаси ҳимоячиси Абдуқодир Ҳусанов бу мавсум “Манчестер Сити” таркибида Англия лигаси кубогида ғолиб чиқди ва фаолиятидаги илк нуфузли совринига эга бўлди.
Энди легионеримизда 16 май куни Англия кубогини қўлга киритиш имкони бор. Бундан ташқари, “Манчестер Сити” Англия Премьер-лигасида ҳам чемпионликни нишонлаб, ички требл қайд этиши мумкин.
Фикрлар