Ҳусанов бир соатда жаҳон футболи тарихига кирди
Дунёнинг кўплаб лигаларида миллий чемпионатлар якунланиб, ёзги таътил бошланган бир паллада футбол жамоатчилигининг эътибори ФИФА томонидан янги форматда ташкил этилган клублар ўртасидаги жаҳон чемпионатига қаратилган.
Ўзбекистонлик футбол ишқибозлари ҳам АҚШга турли минтақалардан келган 32 та жамоа иштирокидаги турнирни алоҳида эътибор билан кузатиб бормоқда. Чунки ушбу мусобақада Ўзбекистон миллий терма жамоаси марказий ҳимоячиси Абдуқодир Ҳусанов тўп тепаётган “Манчестер Сити” ҳам қатнашяпти.
Хосеп Гвардиола шогирдлари “G” гуруҳида дастлабки турда Марокашнинг “Видад” жамоасини 2:0 ҳисобида енгганидан кейин иккинчи турда Бирлашган Араб Амирликларининг “Ал-Айн” футболчилари билан беллашди.
Муҳим жиҳати шундаки, Абдуқодир Ҳусанов бир неча ой давом этган танаффусдан кейин ниҳоят жамоасининг бошланғич таркибига қайтарилди. Хосеп Гвардиола жаҳон чемпионатининг биринчи туридан кейин таркибни тўлиқ янгилашини билдирганди. Испаниялик мутахассис бу тактикаси ортидан Ҳусанов яна майдонга тушди.
Учрашув Англия клубининг тўлиқ устунлигида ўтди. 8-дақиқада Илкай Гюндоган рақиб жарима майдончасида пайдо бўлиб, ҳисобни очди. 27-дақиқада эса ёш аргентиналик иқтидор эгаси Клаудио Эчеверри иккинчи голни уриб, ҳисобдаги фарқни оширди.
Танаффусга чиқиш олдидан жамоа тўпурари Эрлинг Холанд пенальтидан мукаммал зарба йўллаб, ҳисобни йирик кўринишга келтирди.
Иккинчи бўлимда ҳам “шаҳарликлар”ни тўхтатиб бўлмайди. Шу ўринда, учрашув давомида фаол ўйнаб келган Абдуқодир Ҳусанов 58-дақиқада қўполлиги учун огоҳлантирилгани ва уч дақиқадан сўнг ўрнини Оскар Боббга бўшатиб берганини таъкидлаш лозим.
Ҳусанов майдонни тарк этганидан кейин жамоадошлари яна учта гол урди. 70-дақиқада тажрибали плеймейкер Илкай Гюндоған ўз номини таблога ёздириб, дубль қайд этди.
Орадан кўп ўтмай, Абдуқодир Ҳусанов ўрнига майдонга тушган Оскар Бобб ўзини кўрсатиб, турнирдаги дебют голини урди. Учрашувдаги ҳисобга янги ўйинчи Райан Шерки нуқта қўйдию 89-дақиқада франциялик ярим ҳимоячининг зарбаси амирлик футболчилари дарвозасидан жой олди – 6:0.
Абдуқодир Ҳусанов 61 дақиқа ўйнаган бўлса-да, ФИФА шафеълигида ўтказилаётган янги форматдаги клублар ўртасидаги жаҳон чемпионатида қатнашган биринчи ўзбекистонлик футболчи сифатида ўз номини тарихга ёздириб қўйди.
Бундан ташқари, 21 ёшли легионеримиз ушбу мусобақада сариқ карточка олган “Манчестер Сити” таркибидаги биринчи ўйинчи бўлди. Аввалги учрашувда “шаҳарликлар”дан ҳеч ким огоҳлантирилмаган, фақат Рико Льюис тўғридан тўғри қизил карточка олиб, майдондан четлатилган эди.
Энди “Манчестер Сити” гуруҳдаги охирги учрашувни худди ўзи каби олти очко жамғарган Италиянинг “Ювентус” жамоасига қарши тўп тепади. Муддатидан аввал плей-оффга чиққан ҳар икки жамоанинг ўзаро ўйини гуруҳда қайси жамоа биринчи ўринни эгаллашини ҳал қилиб беради. Учрашув 26 май куни бўлиб ўтади.
Ҳусановнинг узоқ кутилган ўйини қандай баҳоланди?
Ҳусанов ўрнига “Жумавой”!
Шомуродов кучайиб кетди...
“Топ-5” ёки Туркия: Шомуродов қайси жамоани танлагани маъқул?
Роналду Машариповга: Нима, сен Мессининг мухлисимисан?!
Фикрлар