Ҳусанов қандай баҳоланди? “Манчестер Сити” йил якунларини эълон қилди

“Манчестер Сити” клубининг расмий сайти 2025-2026 йилги мавсум бўйича асосий жамоанинг ҳар бир ўйинчиси иштироки бўйича таҳлил натижаларини эълон қилди.

Sports.uz портали жамоа ҳимоячилари ўйини бўйича берилган маълумотларни ўқувчилар эътиборига ҳавола этиўни маъқул топди. Ушбу материалдаги маълумотлар асосида Абдуқодир Ҳусанов жамоа ҳимоячилари орасида айрим кўрсаткичлар бўйича етакчи экани намоён бўлади.

Жон Стоунз

Ўйинлар: 18
Голлар: 0
Ассистлар: 0
Дақиқалар: 1144

“Манчестер Сити” афсонаси ва клуб тарихидаги энг яхши ҳимоячилардан бири бўлган Жон Стоунз учун жамоадаги охирги мавсуми ҳам қувончли, ҳам қайғули кечди.

Жароҳатлар яна унинг ўйинларда қатнашиш имкониятини сезиларли даражада чеклаб қўйди ва майдондаги вақтини қисқартирди. Бироқ, у “Манчестер Сити”даги ажойиб ўн йиллик фаолияти давомида кўп бор намоён қилганидек, майдонга туширилган ҳар бир пайтда ўзини энг яхши томондан кўрсатди.

Май ойида “Уэмбли” стадионида Англия кубоги финалида “Челси” устидан 1:0 ҳисобидаги ғалабадан кейин Стоунзнинг жамоани тарк этаётган Бернарду Силва билан биргаликда Англия кубогини боши узра кўтаргани жуда рамзий ва таъсирли лаҳза бўлди.

“Манчестер Сити” мухлислари машҳур “Жонни Стоунз” қўшиғини биргаликда куйлаётган бир пайтда бу учрашув унинг “Этиҳод Стэдиум”даги ажойиб фаолияти учун идеал якун бўлди.

Рико Льюис

Ўйинлар: 22
Голлар: 2
Ассистлар: 3
Дақиқалар: 1105

“Сити” ҳимоясидаги кучли рақобат туфайли академия тарбияланувчиси майдонда ўйин вақтига эга бўлиш учун сабр қилишга мажбур бўлди. Бироқ имконият пайдо бўлган ҳар сафар жамоа манфаати учун бор кучини сарфлади ва ўзининг фидойилиги, интизоми ҳамда тактик мослашувчанлигини намоён қилди.

Нисбатан ёш бўлишига қарамай, Льюиснинг тажрибаси ва билимлари академиядан чиққан янги авлод ёш истеъдодларининг асосий таркибга муваффақиятли мослашишига катта ёрдам берди.

22 ёшли футболчи клуб асосий жамоаси сафидаги илк дублини расмийлаштириб, ўзи учун унутилмас кунни бошдан кечирди.

Райан Айт-Нури

Ўйинлар: 28
Голлар: 0
Ассистлар: 5
Дақиқалар: 1605

Жазоирлик чап қанот ҳимоячиси 2025 йилги ёзги трансфер ойнаси бошида амалга оширилган бир қатор харидлардан бири сифатида келиб, “Манчестер Сити”даги биринчи мавсумини жуда муваффақиятли ўтказди.

Унинг портловчи тезлиги ва жисмоний кучи туғма техник маҳорати билан уйғунлашиб, ҳар сафар майдонга тушганида “Сити” ҳимоясига қўшимча устунлик берди.

25 ёшли футболчининг клуб ва терма жамоадаги юқори даражадаги катта тажрибаси ҳам турли мусобақаларда ўз аксини топди. Клубдаги биринчи мавсумидан кейин Айт-Нури келаси мавсумда янада катта ютуқларга эришиш учун жуда қулай ҳолатда турибди.

Абдуқодир Ҳусанов

Ўйинлар: 37
Голлар: 0
Ассистлар: 0
Дақиқалар: 2817

2025 йил январь ойида шартнома имзолаб, “Манчестер Сити” асосий жамоасида бир йил ҳаракат қилганидан сўнг ўзбекистонлик ҳимоячи 2025/26 йилги мавсумнинг иккинчи ярмида ўз салоҳиятини тўлиқ намоён қилди.

Ҳусановнинг фавқулодда кучи ва тезлиги унинг меҳнатсеварлиги ҳамда муросасиз жасорати билан бирлашиб, уни қисқа вақт ичида мухлислар севимлиси ва асосий таркибнинг доимий аъзосига айлантирди.

Январь ва март ойларида “Этиҳод”да ойнинг энг яхши футболчиси деб топилган Ҳусанов Карабао кубоги ва Англия кубогини қўлга киритган жамоанинг муҳим фигураларидан бири бўлди.

У ҳали атиги 22 ёшда эканини ҳисобга олсак, Ҳусанов келажакда янада ўсиши аниқ кўринмоқда.

Мавсум давомида унинг ўйинида кўплаб ёрқин лаҳзалар бўлди, аммо мавсум охирида “Бёрнли”га қарши сафар учрашувидаги жасур ва таъсирли 90 дақиқаси ўзбек футболчисининг жамоага қанчалик катта фойда келтиришини яққол кўрсатди. Ҳафта ўртасида “Тёрф Мур” стадионидаги ўйин ҳар қандай футболчининг характери ва руҳиятини синовдан ўтказадиган баҳс ҳисобланади. Ҳусанов эса барча жиҳатдан кутилганидан ҳам яхшироқ ҳаракат қилиб, жамоанинг 1:0 ҳисобидаги қийин ғалабасига катта ҳисса қўшди.

Марк Гехи

Ўйинлар: 20
Голлар: 2
Ассистлар: 1
Дақиқалар: 1690

Қишки трансфер ойнаси охирида “Кристал Пэлас”дан “Манчестер Сити”га ўтган англиялик марказий ҳимоячи илк кунларданоқ ўзини яхши томондан кўрсатди ва асосий таркибга муаммосиз мослашди.

Унинг табиий истеъдоди, майин техникаси, тўп билан муомаладаги хотиржамлиги, юқори даражадаги тажрибаси ҳамда ўйинни тушуниш қобилияти дарҳол кўзга ташланди.

“Сити” марказий ҳимоясидаги бир нечта муҳим футболчиларнинг жароҳатлари туфайли Гехи қисқа фурсатда Абдуқодир Ҳусанов билан мустаҳкам ҳимоя жуфтлигини шакллантирди.

Рубен Диаш

Ўйинлар: 33
Голлар: 2
Ассистлар: 0
Дақиқалар: 2646

Португалиялик марказий ҳимоячи яна бир бор “Сити” ҳимоясининг ҳақиқий устуни эканини исботлади, гарчи унинг мавсуми ҳам жароҳатлар туфайли бир неча бор тўхтаб қолган бўлса-да.

Диашнинг етакчилик фазилатлари ва мақсад сари интилиши ҳар бир ҳаракатида кўриниб турарди. 29 ёшли футболчи ҳар доим бор кучини сарфлайдиган ҳақиқий жамоавий ўйинчи бўлиб қолди.

Клубнинг сўнгги йиллардаги муваффақиятларида катта ҳисса қўшган ирода ва иштиёқни у яна бир бор намоён этди.

Диаш гол урса, одатда бу гол томоша қилишга арзийди. Унинг ноябрь ойида Премьер-лигада “Сандерленд”га қарши уй ўйинида урган голи мавсумнинг энг чиройли голларидан бири бўлди.

Натан Аке

Ўйинлар: 32
Голлар: 0
Ассистлар: 0
Дақиқалар: 1644

Сўнгги ўн йилликда инглиз футболидаги энг ишончли ва нафис ҳимоячилардан бири сифатида ўзини намоён қилган нидерландиялик футболчи яна юқори савиядаги ўйин кўрсатди.

У ҳам марказий ҳимояда, ҳам чап қанот ҳимоясида ўзининг бой тажрибасини намойиш қилди. Хотиржамлик ва маҳоратининг уйғунлиги Акенинг нега “Сити” ҳимоясидаги энг ҳурматли ва қадрли футболчилардан бири эканини яна бир бор исботлади.

Март ойида “Арсенал”га қарши Карабао кубоги финалида асосий таркибдан жой олган Аке “Уэмбли”да ажойиб ўйин намойиш қилди.

Унинг тактик билимлари, катта ўйинлардаги тажрибаси ва ўйинни мукаммал англаши жамоанинг 2:0 ҳисобидаги ғалабасига хизмат қилди ҳамда Пеп Гвардиоланинг алоҳида мақтовига сазовор бўлди.

Макс Аллейн

Ўйинлар: 7
Голлар: 1
Ассистлар: 0
Дақиқалар: 446

Узоқ вақтдан бери академиянинг энг истиқболли ёш истеъдодларидан бири сифатида баҳоланиб келган марказий ҳимоячи “Уотфорд”даги ижараси давомида жуда яхши ўйин кўрсатган эди.

2026 йил январь бошида “Сити” ҳимоясидаги жароҳатлар инқирози сабабли у кутилмаганда клубга қайтарилди.

Премьер-лигадаги дебют учрашувида “Брайтон”га қарши майдонга тушган Аллейн дарҳол юқори босимли муҳитга кириб келди. Бироқ у 1:1 ҳисобидаги дуранг баҳсда ўзининг истиқболли салоҳияти ва етуклигини намойиш қилди.

Шундан кейин Карабао кубоги ярим финалининг биринчи ўйинида “Сент Жеймс Парк” стадионида “Сити”нинг 2:0 ҳисобидаги ғалабасида яна бир ажойиб ўйин кўрсатди.

У ерда ёш футболчи ҳам рақиб босимига, ҳам маҳаллий мухлисларнинг кучли қўллаб-қувватлашига муваффақиятли қарши тура олди.

Аллейннинг асосий жамоадаги ёрқин даврининг энг юқори нуқтаси, эҳтимол, Англия кубогининг учинчи босқичида “Эксетер Сити” устидан қозонилган 10:1 ҳисобидаги йирик ғалаба бўлди.

“Манчестер Сити” асосий жамоасидаги дебютидан атиги уч кун ўтгач, Пеп Гвардиола унга яна асосий таркибдан жой берди ва Аллейн бу ишончни оқлаб, тўлиб-тошган “Этиҳод” стадионида ўзининг биринчи голини урди.

Файзуллаев бир гол билан колумбиялик қизлар ёқимтойига айланди

Мундиал қаҳрамони Файзуллаев ниҳоят тилга кирди

Қозоқлар бу сенсацияни Ҳусановнинг “Сити”га ўтишидан аввал эълон қилмоқчи эди!

Ўзбекистоннинг мағлубиятдан кейинги иши мексикаликларни ҳайратга солди

Ўзбекистон мана шу футболчилар сабаб ютқазди!