Ҳусановда ўзгариш бўлиши кутиляпти

ФИФА кунлари якунланиб, футболчилар ўз клубларига қайтган ва чемпионатлар ўйинларига тайёргарлик бошлаган бир паллада “Ланс” бош мураббийи Уилл Стилл ўз жамоаси ҳимоя чизиғида юзага келаётган масала ечимини топишига тўғри келаяпти.

“Ланс” анчадан бери уч ҳимоячи билан ўйнайди. Бу схема “Ланс”ни Франция чемпионатидаги энг мустаҳкам ҳимояга эга жамоага айлантирган. Жорий мавсумда ҳам лансликлар монаколиклар билан бирга энг кам гол ўтказган жамоа ҳисобланади.

Клуб раҳбариятининг режасига кўра, 2021 йилдан бери асосий марказий ҳимоячи вазифасини бажариб келган Кевин Дансо “Рома”га трансфер қилиниши, унинг ўрнини Абдуқодир Ҳусанов эгаллаши керак эди.

Бу режа 50 фоизга амалга ошди. Ўзбек легионери “Ланс” ҳимояси марказини эгаллаб бўлди ва ҳимоя чизиғи етакчисига айланди. Дансо Римда тиббий кўрикдан ўтолмагани боис, режанинг биринчи ярми барбод бўлди.

Австриялик ҳимоячи чуқурлаштирилган тиббий кўриклардан қайта-қайта ўтказилди, таниқли шифокорлар текширувидан ўтказилди ва бошида юрагида нуқсон борлиги ҳақида қўйилган ташхислар тасдиқланмади.

Кевин Дансо энди жамоа сафига қайтди. Бироқ энди унга жой топиш керак. Ундан қолган позицияни Ҳусанов ўзиники қилиб бўлган. Хўш, Уилл Стилл энди қандай йўл тутади?

Бу саволга topmercato.com портали экспертлари жавоб қидирди.

- Уилл Стилл бош мураббий сифатида тезроқ бир қарорга келиши керак. У Кевин Дансони ўз жойига қайтариш ёки ҳозиргача бу позицияда бехато ўйнаб келаётган Абдуқодир Ҳусановни ҳимоя марказида қолдиришни ҳал этиши кутиляпти. Ўзбек футболчиси ҳамкасби йўқлига ҳимоянинг муҳим бўлагига айланиб бўлди.

Абдуқодир Жонатан Градит ва Факундо Медина билан бирга жамоа ҳимоясини мустаҳкам ушлаяпти. Бу учлик ёрдамида “Ланс” чемпионатнинг еттита ўйинидан тўрттасида ўз дарвозаси дахлсизлигини ушлаб қолди ва ҳали бирор маротаба енгилгани йўқ.

Статистикага кўра, Ҳусанов 23 ёшгача бўлган футболчилар орасида бутун Европа бўйича иккинчи ўринда турибди. Яккакурашларда 64 маротаба ғолиб чиққан ўзбек футболчиси бу кўрсаткич бўйича фақатгина “Арсенал” ҳимоячиси Вильям Салибадан ортда қоляпти холос.

Кўпчилик экспертлар тахминига кўра, Уилл Стилл катта эҳтимол билан Кевин Дансони ҳимоя марказига қайтаради. Табиийки, ҳамма ишни юқори даражада уддалаётган Ҳусановни четга суриб қўйиш адолатсизлик бўлади. 20 ёшли легионернинг универсаллиги унга  ўнг қанотга кўчиб, Жонатан Градит ўрнида тўп тепиш имконини беради. Факундо Медина чапақай бўлгани учун ўз позициясини ҳеч кимга бериб қўймади.

Энди “Ланс” мураббийлар штаби Франция чемпионатининг энг мустаҳкам ҳимоя чизиғини қайта ташкил этишига тўғри келмоқда. Бу ҳолатда Абдуқодир Ҳусановни майдонда қолдириш ўта муҳим аҳамият касб этади.

Чунки бу ўйинчининг трансфери  суммаси кескин кўтарила бошлади. Transfermarkt экспертлари Ҳусановни 5 миллион еврога баҳолаяпти. Абдуқодир шу даражада ўсишда давом этса, тез орада у янги босқичга кўтарилади, - деб ёзмоқда topmercato.com портали эксперти Матье Шамбенуа.

Эслатиб ўтамиз, Абдуқодир Ҳусанов футбол сир-асрорларини “Бунёдкор” клуби тизимида ўрагана бошлаган. Кейинчалик Беларуснинг “Энергетик-БГУ” жамоасига кўчиб ўтиб, профессионал фаолиятини ўша ерда бошлади.

Ҳусанов Ўзбекистоннинг турли ёшдаги терма жамоаларида ўз иқтидори ва салоҳиятини намойиш қилиш орқали хориж клублари назарига тушди. 2023 йилнинг ёзида “Ланс” ўзбек футболчисини трансфер қилди.

“Ланс” Ҳусанов учун қанча сўрайди?

Россияда Ўзбекистоннинг жаҳон чемпионатига чиқишига ишонишяпти

Шомуродов ўрнига уч ҳужумчи!

Ўзбекистон ҳимоясини мустаҳкам ушлаб турган Ҳусановнинг ўйини Европада қандай баҳоланяпти?

Абдуқодир Ҳусанов Франция чемпионатида иштирок этган биринчи ўзбекистонлик чарм тўп устаси сифатида тарихда қолди. Ҳамюртимиз Лига 1 ўйинларидан ташқари, УЕФАнинг учта энг нуфузли турнири – Чемпионлар лигаси, Европа лигаси ва Конференциялар лигасида ҳам ўз дебютини ўтказишга улгурди.