Италия клуби Шомуродовга жой бериш учун тактикасини ўзгартиришга қарор қилди

А Серия аутсайдерларидан бири – “Крамонезе” олий дивизиондаги жойини сақлаб қолиш учун курашда Элдор Шомуродовга таянмоқчи.

Ўтган мавсум В Сериядан юқорига кўтарилган жамоа Италия чемпионатининг энг кучли клублари билан тўқнашувларда гол уришга қийналмоқда.

Статистика мутахассисларининг ҳисоб-китобларига қараганда, кремоналик футболчилар мавсумнинг дастлабки 15 та учрашувида рақиб дарвозаси томон 210 маротаба зарба берган ва улардан фақат 11 таси голга айланган.

Бу кўрсаткич бўйича “Кремонезе” фақатгина “Сампдория”дан олдинга ўта олган холос.

Бош мураббийи Массимилиано Альвинини қийнаётган энг катта муаммо самарадорлик экани кўриниб турибди. Шу боис, кремонликлар ўз сафига “Рома”да ўйин амалиётисиз қолиб кетаётган Элдор Шомуродовни қўшиб олмоқчи.

“Кремонезе” ўзбек футболчисини қишки трансферлар вақтида асосий нишон қилиб белгилагани бежиз эмас, албатта. La Gazzetta dello Sport  нашри журналисти Ф.Корначчианинг ёзишича, Шомуродов бўйи баланд бўлишига қарамай, унинг тезлиги катта, курашувчан, бир неча позицияда ўйнай олиш қобилиятига эга экани Массимилиано Альвинини жиддий қизиқтириб қўйган.

Бундан ташқари, Элдор Италияда учинчи мавсумини ўтказмоқда ва А Серияга тўлиқ мослашиб бўлган.

Қолаверса, “Кремонезе” Рим клуби билан дўстона алоқалар эга экани Шомуродов учун курашда бу клубга қўшимча имтиёз келтириши мумкинлиги айтиляпти.

Массимилиано Альвини Шомуродов келадиган бўлса, ўзи қўллайдиган тактик схемаларни ўзбек футболчисига мослаштиришни режалаштирмоқда. Маълумотларга қараганда, Альвини икки ҳужумчига мўлжалланган 3-4-1-2 схемасида марказий ҳужумчилар сифатида Элдор ва Сирил Дессерсни ўйнатиб, плеймейкер сифатида Давид Окерекедан фойдаланмоқчи.

Агар жамоа биргина марказий ҳужумчи билан ўйнашига тўғри келса бу вазифани Дессерс бажариб, икки тезкор ҳужумчи футболчи – Шомуродов  чап қанотдан, Окереке ўнг томондан ҳужумни қўллаб-қувватлаб туради.

Ҳар икки вазиятда ҳам Шомуродов бошланғич таркибда майдонга туширилади ва унга “Рома”да етишмаётган асосий омил – ўйин амалиёти кафолатланади.

“Кремонезе” легионеримизнинг келишига тайёргарлик кўраётган бўлса-да, Шомуродовни қўлга киритиш осон бўлмайди. Биринчи омил, ҳамюртимизнинг трансфер нархи билан боғлиқ. Римликлар 18 миллион еврога харид қилинган футболчини имкон қадар қимматроқ сотишни режалаштирган. Ўтган ёзда пойтахтликлар 10 миллион евролик таклифларни ҳам қабул қилгани йўқ.

Қолаверса, яқинда “Рома” спорт директори Тьягу Пинто Элдор Шомуродов ва Матиас Вина ижарага берилмаслигини ва уларни олмоқчи бўлган клублар тўлиқ трансфер қилиши кераклигини билдирди.  

Иккинчи омил шундан иборатки, Элдор Шомуродовнинг ўзида танлов имконияти бор. Энг содда вариант Римда қолиш. Чунки амалдаги битим 2026 йилнинг ёзигача тузилган. Ёки ҳамюртимиз А Сериянинг ўзидан “Кремонезе”га қараганда, кучлироқ ҳисобланган “Монца”, “Торино”, “Болонья” каби  клублардан бирини танлаши мумкин. Улар қаторига яна бошқа клублар қўшилиши эҳтимоли ҳам катта, албатта.

Италия клуби Шомуродов трансферига муносабат билдирди

Шомуродов устозини Италияга чақиряпти!

Шомуродов ва Абрахамдан кейин Дибала ҳам “Рома”дан кетадиган бўляпти!