Легионеримиз рўза тутиб ўйнаш ҳақида фикр билдирди

1 апрель, 19:09
1
Футбол

Ўзбекистонлик футбол ишқибозлари Россия Премьер-лигаси жамоалари орасидан “Рубин”га ҳам мухлислик қилаётган бор гап. Сабаби қозонликлар сафида икки футболчимиз – Рустам Ашурматов ва Умарали Раҳмонов ўйнайди.

Тажрибали ҳимоячи Рустам Ашурматов кейинги пайтда жамоанинг асосий таркиб ўйинчисига айланиб бормоқда.

“Рубин” навбатдаги учрашувни ўз майдонида ўтказиб, “Ахмат” жамоасини 2:1 ҳисобида мағлубиятга учратди ва очколари сонини 32 тага етказиб олди.

Баҳсда тўлиқ ўйнаган ва ғалаба катта ҳисса қўшган Рустамжон Ашурматов sport.evening-kazan.ru сайтига ўз фикр-мулоҳазаларини билдириб ўтди.

- Бундай ўйинда очко йўқотиш алам қиларди. Ўйиннинг охирида ҳимояни мустаҳкам ушлашга тўғри келди.

Мен асосий таркиб ўйинчисига айландимми? Бошланғич таркиб ўйинчиси бўлишга уриняпман, лекин ҳаммасини бош мураббий ҳал қилади.

Рўза тутиш қанчалик оғир? Биз рўзани болалигимиздан бери тутамиз, шунинг учун бизга рўза ҳеч қадай муаммо туғдирмайди, - деди Рустамжон Ашурматов.

27 ёшли ҳимоячи “Бунёдкор” жамоаси тарбияланувчиси ҳисобланади. Профессионал фаолиятини “Қўқон-1912” жамоасида бошлаган.

Кейинчалик “Бунёдкор”га қайтиб, тўрт мавсум ўйнаганидан кейин Жанубий Кореяга йўл олди. Легионер сифатида “Кванджу” ва “Канвон” жамоаларида фаолият юритди.

2022 йили юртимизга қайтиб, “Навбаҳор”дан қўним топган тажрибали ҳимоячи Суперлигада узоқ қолмади.

Ашурматов 2023 йилнинг бошида ўша пайт Россия чемпионатининг биринчи лигасида иштирок этаётган “Рубин”га кўчиб ўтди. Рустам биринчи лигада ярим мавсум ўйнаб, қозонликларнинг Премьер-лигага йўлланма олишига ёрдам берди.

Жорий мавсум Россия Премьер-лигасида 11 маротаба майдонга тушиб, ҳимоядаги вазифаларини уддалашдан ташқари, битта гол уришга ҳам эришди. Бундан ташқари, Россия кубогида ҳам беш маротаба ўйинда қатнашди ва битта гол урди.

Ашурматов Ўзбекистон миллий терма жамоасининг асосий ўйинчиларидан ҳисобланади. Халқаро миқёсдаги фаолиятини 2017 йили бошлаган ҳимоячи бугунги кунда қадар жами 34 та беллашув ўтказиб, яқинда Гонконг дарвозасига терма жамоамиздаги илк голини киритди.