“Моуриньо эффекти” ва Шомуродовга мос топ-лигалар айтилди!

Моуриньонинг услуби таъсир қилган ваЎзбекистон U-23 терма жамоасини Париждаги Олимпия ўйинларига олиб чиққан Тимур Кападзе Россия оммавий ахборот воситаларига берган интервьюсида А Серияда фаолият юритаётган Элдор Шомуродов ҳақидаги саволларга ҳам жавоб берди.

Sports.uz портали ўзбекистонлик футбол ишқибозлари эътиборига ушбу интервьюнинг қизиқарли қисмларини ҳавола этади.

— Аббос Файзуллаев учун кутилаётган йўлни Элдор Шомуродов босиб ўтган: Ўзбекистон чемпионати – Россия Премьер-лигаси – “Женоа” – “Рома”.  Унинг йўли намунами?

— Аббос Россияга Элдорга қараганда тезроқ мослаша олди. Шомуродов бу мамлакат ва унинг чемпионатига кўникиб, ўзини кўрсата бошлаганда, Италияга кетишига тўғри келди. Бу йўл уни “Рома”га олиб келди.

— У ерда ишлари кутилганидек юришмади...

— Ҳақиқатан, Элдор бундан-да яхши очилиши мумкин эди. Лекин ҳамон салоҳияти бор. Балки ўзига мос бўлмаган жамоа ва мураббийга дуч келгандир. Унга Жозе Моуриньонинг услуби таъсир кўрсатгандир.

Италияда тактик ҳолатга кўп урғу берилади. Элдор Шомуродовга Испания ёки Германия чемпионатлари кўпроқ мос келади.

— Россия клублари ҳам Шомуродовга мунтазам қизиқиш билдириб келади. Элдор бу вариантларни кўриб чиқиши керакми?

— Баъзан олдинга икки қадам босиш учун, ортга бир қадам ташласа ҳам бўлади. Италияда захира ўтирганидан Россияда мунтазам ўйнагани яхши.

Эслатиб ўтамиз, Элдор Шомуродов “Машъал” клуби тарбияланувчиси ҳисобланади. Ўзбекистондаги фаолияти давомида муборакликлардан ташқари “Бунёдкор” сафида ҳам тўп тепган.

2017 йилнинг 15 июлида Россия Премьер-лигаси вакили “Ростов” ўзбек ҳужумчисини 300 минг евро эвазига трансфер қилди.

Шомуродов уч йил давомида ушбу жамоада тажриба оширди. “Ростов” 2020 йилнинг октябрида ўзбек легионери бўйича бир неча таклифлар орасида “Женоа” вариантини танлади. Италиянинг энг қадимий клуби турли бонусларни қўшиб ҳисоблаганда Шомуродов трансферига 9,5 миллион евро харажат қилди.

Италиядаги дебют мавсумидаёқ саккизга гол урган ҳужумчимизни “Рома” ўз сафига қўшиб олди. Бу трансфер пойтахт клубига жами 19,6 миллион еврога тушди. Бироқ Жозе Моуриньо легионеримизга етарли даражада ўйин амалиёти бермади.

Бунинг   оқибатида Элдор Шомуродов ижара асосида “Специя” ва “Кальяри” каби клубларда тўп тепиб келди.

Жорий мавсумни яна Рим клубида бошлаган  29 ёшли ҳужумчимиз А Серия ва УЕФА Европа лигаси мусобақаларида ўн маротаба майдонга тушиб, биттадан гол ва ассист муаллифи бўлди.

Шомуродовга нима бўлди? Ҳамма Элдордан хавотирда!

Шомуродовнинг ишлари юришиб кетадиган бўлди. “Рома” Элдорни яхши биладиган мураббий танлади!

Ўзбекистон Қатарни неча марта ютган? Бу гал нима бўлади?